ထိုင်းနိုင်ငံတွင် ၁၃ နှစ်ကျော်ကြာ ပိတ်​လှောင်ပြီး အဓမ္မအလုပ်စေခိုင်းခံရတဲ့ မြန်မာအမျိုးသမီးကို ကယ်ထုတ်နိုင်

ထိုင်းနိုက်ငံတွင် ၁၃ နှစ်ကျော်ကြာ အဓမ္မအလုပ်စေခိုင်းခံရကာ ပိတ်လှောင်ခံထားရတဲ့ မြန်မာအမျိုးသမီးတစ်ဦးကို နေအိမ်တစ်လုံးကနေ ကယ်ထုတ်နိုင်ခဲ့တယ်လို့ ထိုင်းအထူးစုံစမ်းစစ်ဆေးရေးဌာန(DSI)ညွှန် ကြားရေးမှူး Trairit Temahiwong က ဒီဇင်ဘာ ၅ ရက်မှာ ပြောကြားပါတယ်။

အဲဒီမြန်မာအမျိုးသမီးရဲ့ဖြစ်စဉ်ကို အလုပ်သမားကာကွယ်ရေးကွန်ရက်(LPN)က DSI ကို တိုင်ကြားပြီးနောက် ဒီဇင်ဘာ ၄ ရက်က လွတ်မြောက်ခဲ့တာဖြစ်တယ်လို့ Dr Trairit က ပြောပါတယ်။

အသက် ၂၆ နှစ်အရွယ် အဲဒီမြန်မာအမျိုးသမီးကို ဘန်ကောက်မြို့ရဲ့ Suan Luang ခရိုင်၊ Pakamas အိမ်ရာရဲ့ ၁၁လမ်းရှိ ​နေအိမ်တစ်လုံးမှာ ဖမ်းဆီးထိန်းသိမ်းကာ အဓမ္မအလုပ်စေခိုင်းခံရတာဖြစ်ပါတယ်။

DSI ရဲ့ လူကုန်ကူးမှုတားဆီးနှိမ်နှင်းရေးရုံးက တာဝန်ရှိသူတွေအဖွဲ့ အဲဒီအိမ်ကို သွားရောက်ခဲ့ပြီး မြန်မာအမျိုးသမီးကို ကယ်ထုတ်ခဲ့ပြီး မြန်မာအမျိုးသမီးဟာ မောပန်းကြောက်ရွံ့နေခဲ့တယ်လို့ Dr Trairit က ဆိုပါတယ်။

Public Service Announcement

မြန်မာအမျိုးသမီးဟာ အဲဒီအိမ်ကနေချက်ချင်းခေါ်ထုတ်သွားဖို့ ထိုင်းအာဏာပိုင်တွေကို တောင်းဆိုခဲ့တယ်လို့ Dr Trairit က ဆက်ပြောပါတယ်။

“ထိုင်းမှာက အဲလိုဖြစ်ရပ်​တွေ ရှိတယ်။ အခုဖြစ်စဥ်လည်း အဖွဲ့အစည်းတစ်ခုက ကျွန်​တော်တို့ဆီတိုင်ကြားလာ​တော့ DSIနဲ့ အတူ ကယ်ထုတ်နိုင်ခဲ့တာပါ”လို့ LPNမှ ကိုနိုင်နိုင်က လူထု​နွေဦးသို့ ​ပြောသည်။

မြန်မာအမျိုးသမီးရဲ့ ကနဦးပြောကြားချက်အရ သူမဟာ ၁၃ နှစ်ကျော်ကြာ လုပ်ခလစာမရရှိဘဲ အဲဒီအိမ်မှာ အလုပ်လုပ်ခဲ့ရပြီး စတင်ရောက်ရှိတဲ့ နှစ်ကို အတိအကျ မမှတ်မိဘူးလို့ ဆိုပါတယ်။

လက်ရှိမှာ မြန်မာအမျိုးသမီးကို ပြန်လည်ထူထောင်ရေးနေရာကို ပို့ဆောင်ထားပြီး လိုအပ်တဲ့ တွေ့ဆုံမေးမြန်းမှုတွေလုပ်ဆောင်ဖို့ သင့်တော်တဲ့ ရုပ်ပိုင်းဆိုင်ရာစမ်းသပ်ကုသမှုတွေ ပေးနေတယ်လို့ Dr Trairit က ပြောပါတယ်။

ဒီအမှုနဲ့ပတ်သက်လို့ ပြစ်မှုကျူးလွန်သူတွေကို ဥပဒေအရ အရေးယူနိုင်ဖို့ ဆက်လက်စုံစမ်းစစ်ဆေးမှုတွေ လုပ်ဆောင်သွားမယ်လို့ ဆိုပါတယ်။

ကိုးကား – Bangkok Post