ရှမ်းပြည်နယ် မြောက်ပိုင်း မုံးကိုးဒေသတွင် အာဏာသိမ်းစစ်ကောင်စီတပ်က ဒီဇင်ဘာ ၁၉ရက်တွင် ထိုးစစ်ဆင်မှုများအကြိမ်ကြိမ်ပြုလုပ်ခဲ့၍ တိုက်ပွဲပြင်းထန်ခဲ့ပြီး စစ်ကောင်စီတပ်ဖွဲ့ဝင် ၇၀ ကျော်ထိခိုက်သေဆုံးကြောင်း ကိုးကန့်လက်နက်ကိုင်အဖွဲ့(MNDAA)က ယနေ့ ထုတ်ပြန်သည်။
စစ်ကောင်စီတပ်သည် ယမန်နေ့ မနက် ၆နာရီခန့်မှစ၍ MNDAA၏ မန်ရန် တပ်စခန်းကို လက်နက်ကြီး များဖြင့် စတင်ပစ်ခတ်ကာ ခြေလျင်တပ်ဖွဲ့ဖြင့် ထိုးစစ်ဆင်တိုက်ခိုက်လာကြောင်း၊ နေ့လည်ပိုင်းတွင် သံချပ်ကာကားများ အပါအဝင် လက်နက်ကြီး များ ပစ်ခတ်ခဲ့ကြောင်း၊ အင်အား ၅၀၀ ကျော်ဖြင့် ၉ကြိမ် တိုင်တိုင် ထိုးစစ်ဆင်လာရာ MNDAAက ကောင်းမွန်စွာ ခုခံတိုက်ခိုက်နိုင်ခဲ့ကြောင်း ဖော်ပြထားသည်။
စစ်ကောင်စီဘက်မှ ထိခိုက်ဒဏ်ရာကျဆုံး(၇၀)ကျော်အထက်ရှိကြောင်းနှင့် စစ်ကောင်စီသည် ကျဆုံးမှုများသောကြောင့် MNDAA၏ မုံးကိုးခရိုင် လှိုင်ရှိန်တောင်တန်းနှင့် မန်ရန် တပ်စခန်းကို တိုက်လေယာဉ်ဖြင့် နှစ်ကြိမ်လာရောက်ပစ်ခတ်ခဲ့ကြောင်း ထုတ်ပြန်သည်။
စစ်ကောင်စီသည် MNDAA၏ မန်ရန်တပ်စခန်းကို အကြိမ်ကြိမ်ထိုးစစ်ဆင်တိုက်ခိုက်လာသော်လည်း နောက်ဆုံးတွင် ရှုံးနိမ့်မှုနှင့် အဆုံးသက်ခဲ့ကြောင်း၊ ထို့ကြောင့် စစ်ကောင်စီသည် မန်ရန်တပ်စခန်းကို ပစ်ခတ်တိုက်ခိုက်နိုင်ရန်အတွက် မုံးကိုးခရိုင်သို့ စစ်အင်အားများထပ်မံတိုးချဲ့လာပြီး နှစ်ဦးနှစ်ဘက်၏ စစ်ရေးမှာလည်း ပိုမိုပြင်းထန်လာနိုင်ကြောင်း ဖော်ပြထားသည်။
Public Service Announcement
မုံးကိုးဒေသ၌ MNDAAနှင့် စစ်ကောင်စီတပ်တို့၏ တိုက်ပွဲဖြစ်ပွားမှု လေးလကျော်ကြာပြီဖြစ်ပြီး ယခုရက်ပိုင်းအတွင်း စစ်ကောင်စီတပ်က လေကြောင်း တိုက်ခိုက်မှု၊ လက်နက်ကြီး ပစ်ကူများဖြင့်ပါ ထိုးစစ်ဆင်လျက်ရှိသည်။
