စစ်ကောင်စီတပ်စွန့်ပစ်သွားသည့် တိုက်ပွဲကျအလောင်းများ မြေမြှုပ်ပေးခဲ့ဟု MNDAA ထုတ်ပြန်

-လက်နက်ခဲယမ်းအချို့ထပ်မံသိမ်းဆည်းရမိဟုဆို

အာဏာသိမ်းစစ်ကောင်စီတပ် စွန့်ပစ်သွားသည့် တိုက်ပွဲကျဆုံးခဲ့သော စစ်ကောင်စီတပ်ဖွဲ့ဝင် အလောင်းများကို မြေမြှုပ်ပေးခဲ့ပြီး လက်နက်ခဲယမ်းအချို့လည်း ထပ်မံသိမ်းဆည်းရမိကြောင်း ကိုးကန့်လက်နက်ကိုင်တပ်ဖွဲ့(MNDAA)က ယနေ့ (ဒီဇင်ဘာ၂၂) ထုတ်ပြန်ခဲ့သည်။

MNDAAနှင့် စစ်ကောင်စီတပ်တို့သည် ဒီဇင်ဘာ ၁၉ရက်က မုံးကိုးဒေသ၌ တိုက်ပွဲပြင်းထန်ခဲ့ရာ စစ်ကောင်စီတပ်မှ သေဆုံးထိခိုက်မှု ၁၀၀ခန့်ရှိနိုင်ကြောင်း MNDAAက ထုတ်ပြန်ထားသည်။

ဒီဇင်ဘာ ၂၀ရက်နှင့် ၂၁ရက်တို့တွင် စစ်ရေးအခြေအနေ အနည်းငယ် လျော့ကျလာ၍ စစ်မြေပြင်ရှင်းလင်းရေး လုပ်ဆောင်စဉ် စစ်ကောင်စီတပ်၏ လက်နက်ခဲယမ်းများကို သိမ်းဆည်းရမိခဲ့ကြောင်း၊အလောင်းများကို မြေမြှုပ်ပေးခဲ့ကြောင်း MNDAAက ဆိုသည်။

Public Service Announcement

မြေပြင်စစ်ရေးအခြေအနေ အနည်းငယ်လျော့ကျသော်လည်း MNDAA၏ မန်ရန် တပ်စခန်းနှင့် ရှိကျိကျတောင်တန်းဆီသို့ စစ်ကောင်စီတပ်က လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း ဖော်ပြထားသည်။

MNDAAနှင့် စစ်ကောင်စီတပ်တို့သည် ယခုလအတွင်း တိုက်ပွဲများ ပြင်းထန်ခဲ့ပြီး စစ်ကောင်စီတပ်က လေကြောင်းမှ တိုက်ခိုက်မှုများ အကြိမ်ကြိမ်လုပ်ဆောင်ခဲ့သည်။