ဝန်ကြီးချုပ် နန်းခင်ထွေးမြင့်ကို စုစုပေါင်း ထောင်ဒဏ် နှစ် ၈၀ ထိချထား
NLD ပါတီရဲ့ တိုင်းနဲ့ပြည်နယ်ဝန်ကြီးချုပ်အချို့ကို ရွေးကောက်ပွဲမသမာမှုလုပ်တယ်ဆိုပြီး စစ်ကောင်စီက အမှုထပ်တိုးကာ ဒီနေ့မှာ အဲဒီအမှုနဲ့ ကရင်ပြည်နယ်ဝန်ကြီးချုပ် နန်းခင်ထွေးမြင့်ကို ထောင်ဒဏ် ၃၀ နှစ်ချလိုက်ပါတယ်။
ဝန်ကြီးချုပ် နန်းခင်ထွေးမြင့်ကို ဆူပူအောင်လှုံဆော်မှု ၊အဂတိမှုတွေနဲ့စွပ်စွဲကာ ထောင်ဒဏ် ၇၇ နှစ်ချထားပြီးဖြစ်ပေမယ့် ရွေးကောက်ပွဲမသမာမှုနဲ့ ထောင်ဒဏ် ၃ နှစ် ထပ်ချတာကြောင့် စုစုပေါင်း ထောင်ဒဏ် နှစ် ၈၀ ထိဖြစ်သွားပါတယ်။
စစ်ကောင်စီဟာ ရွေးကောက်ပွဲ မသမာမှုလုပ်တယ်ဆိုပြီး သမ္မတဦးဝင်းမြင့် ၊ နိုင်ငံတော်အတိုင်ပင်ခံပုဂဂိုလ်ဒေါ်အောင်ဆန်းစုကြည် ၊ မန္တလေးတိုင်းဝန်ကြီးချုပ် ဒေါက်တာဇော်မြင့်မောင် ၊ ရခိုင်ပြည်နယ်ဝန်ကြီးချုပ်ဦးညီပု ၊ ကရင်ပြည်နယ်ဝန်ကြီးချုပ် နန်းခင်ထွေးမြင့် တို့ကိုရွေးကောက်ပွဲမသမာမှု လုပ်တယ်ဆိုပြီး ရာဇသတ်ကြီးပုဒ်မ ၁၃၀ (က) နဲ့ စွဲဆိုထားတာပါ။
ဒီလိုစွဲဆိုထားသူတွေထဲက အရင်ဆုံးအနေနဲ့ ဝန်ကြီးချုပ် နန်းခင်ထွေးမြင့် ကို အဲဒီပုဒ်မ နဲ့ ထောင်ဒဏ် ၃ နှစ် ချလိုက်တာဖြစ်ပါတယ်။
Public Service Announcement
ဝန်ကြီးချုပ် နန်းခင်ထွေးမြင့်ဟာ စစ်တပ်အာဏာသိမ်းတဲ့နေ့က ထိန်းသိမ်းခံလိုက်ရတဲ့ရသူပါ။ ထိန်းသိမ်းပြီး ပြန်လွှတ်ပေးလိုက်ပေမယ့် ရက်ပိုင်းအကြာမှာ ပြန်လည်ဖမ်းဆီးခံခဲ့ရပါတယ်။
ထိန်းသိမ်းခံရချိန်က စစ်ကောင်စီတပ်ဖွဲ့ဝင်အရာရှိကြီးတစ်ဦးက NLD ပါတီဟာ ရွေးကောက်ပွဲမှာမဲမသမာမှုလုပ်ပြီး နိုင်ငံတော်အာဏာကိုရယူဖို့ ကြိုးပမ်းတာကြောင့်စစ်တပ်ကအာဏာသိမ်းရတဲ့အကြောင်းအသိပေးခဲ့ပါတယ်။
ဒီလို မဲမသမာမှုရှိတယ်လို့စွပ်စွဲရင် လျို့ဝှက်မဲမလုပ်ဘဲ နဲ့ လူထုရှေ့မှာ မဲပုံးထောင်ပြီး အချိန်မရွေးရွေးကောက်ပွဲ ဝင်လို့ရတဲ့အကြောင်း ပြန်လည် တုန့်ပြန်ရာမှာတော့ အဲဒီစစ်ကောင်စီတပ်ဖွဲ့ဝင်အရာရှိကြီးဟာ တစ်စုံတစ်ရာပြန်မပြောခဲ့ဘူးလို့ ဝန်ကြီးချုပ်က မီဒီယာကို ဖြေကြားခဲ့ဖူးပါတယ်။
