ကားနှစ်စီးဖြင့် စစ်ရေးလှုပ်ရှားလာ၍ တိုက်ခိုက်ရာ စစ်ကောင်စီတပ်မှသေဆုံးမှုရှိဟု KIA ထုတ်ပြန်

စစ်ကား(၂)စီးဖြင့် ကချင်လွတ်မြောက်ရေးတပ်မတော်(KIA)တပ်စွဲထားသောနေရာသို့ စစ်ရေးလှုပ်ရှား တိုးချဲ့ ဝင်ရောက်လာ၍ ခုခံတိုက်ခိုက်ခဲ့ရာ စစ်ကောင်စီတပ်မှ သေဆုံးမှုရှိကြောင်း KIA၏ သတင်းနှင့် ပြန်ကြားရေးဌာန Kachinnet Burmese က သတင်းဖော်ပြသည်။

KIA တပ်မဟာ(၁)၊ တပ်ရင်း(၇) နယ်မြေ ပူတာအို ဆွမ်ပီယန်နှင့် အင်ဆိုင်ယန်ကျေးရွာကြား၌ ဒီဇင်ဘာ ၂၉ရက်က နာရီဝက်ကြာ တိုက်ပွဲဖြစ်ခဲ့ခြင်း ဖြစ်သည်ဟု ဆိုသည်။

စစ်ကောင်စီမှ ခြေလျင်ဖြင့် ထပ်မံစစ်ရေးလှုပ်ရှား တိုးချဲ့ဝင်လာပြီး ယနေ့ (ဒီဇင်ဘာ၃၀) နံနက်တွင် ဆွမ်ပရာဘွမ် တွင် တပ်စွဲနေရာချထားကြောင်း၊ စစ်ကောင်စီဘက်မှ ၎င်းနေရာသို့ စစ်ရေးလှုပ်ရှားမှု ဆက်တိုက် ပြုလုပ်နေ၍ မကြာခဏ တိုက်ပွဲဖြစ်ပွားနေကြောင်း ဖော်ပြထားသည်။

ယခု KIA ထုတ်ပြန်သည့် တိုက်ပွဲဖြစ်စဉ်နှင့်ပတ်သက်ပြီး ပူတာအိုခရိုင် ပြည်သူ့ကာကွယ်ရေးတပ်ဖွဲ့ကလည်း သတင်းထုတ်ပြန်ထားရာ ဆွမ်ပရာဘွမ်ဘက်မှ ပူတာအိုသို့လာသည့် စစ်ကောင်စီတပ်ကို အင်ဆိုင်ယန်ကျေးရွာ အနီးတွင် တိုက်ခိုက်ခဲ့ရာ စစ်ကောင်စီတပ်မှ သေဆုံးမှုများနိုင်ကြောင်း ဖော်ပြထားသည်။ ကချင်ဒေသ တိုက်ပွဲများ တွင် KIAနှင့် PDFများ ပူးပေါင်းပြီး စစ်ကောင်စီကို ခုခံတိုက်ခိုက်နေခြင်း ဖြစ်သည်။

Public Service Announcement