မန္တလေး-ဗန်း​မော်ကားလမ်းတ​လျှောက် ​ကျေးရွာများကို ၄၈နာရီအတွင်း လေ​ကြောင်းတိုက်ခိုက်မည်ဟု စစ်​ကောင်စီက ခြိမ်း​ခြောက်

မန္တလေး-ဗန်း​မော်ကားလမ်းတ​လျှောက်ရှိ ​ကျေးရွာများကို အကြမ်းဖက်စစ်ကောင်စီက လေ​ကြောင်းတိုက်ခိုက်မှုပြုလုပ်တော့မည့် ခြိမ်း​ခြောက်စာကို စစ်ကောင်စီတပ်မှ ကားဖြင့်လာရောက် ကြဲချသွားကြောင်း ထီးချိုင့်မြို့နေဒေသခံများက လူထုနွေဦးသို့ပြောသည်။

“ရပ်မိရပ်ဖများနှင့် မိဘပြည်သူများသိရှိလိုက်နာရန်၊ ခန့်မှန်း မပည KG-24960 အောင်သာယာကျေးရွာအပါ မန္တလေး-ဗန်မော်ကားလမ်းတလျှောက်ရှိ ကျေးရွာများ မိမိတို့ ကျေးရွာရှိ ဘာသာရေးဆိုင်ရာအဆောက်အဦများကို M ဟုလည်းကောင်း၊ ဆေးရုံဆေးခန်းများကို H ဟုလည်းကောင်း၊ စာသင်ကျောင်းနှင့် လူမှုကူညီရေးအသင်းအဖွဲ့များ၏ အဆောက်အဦများကို S ဟုလည်း ကောင်း ခေါင်းမိုးများတွင် အမှတ်အသားပြုလုပ်ထားရန်နှင့် လက်ရှိအချိန်မှစ၍ ၄၈ နာရီအတွင်း အထက်ဖော်ပြပါ ခန့်မှန်း မပညကျေးရွာအပါအဝင် ၎င်းမြောက်ဘက်ကျေးရွာအားလုံးကို လေကြောင်းတိုက်ခိုက်မှုပြုလုပ်သွားမည်ဖြစ်ကြောင်း အသိပေးအပ်ပါသည်”ဟု ကြဲချသည့်စာတွင် ​ရေးသားထားသည်။

ယနေ့(ဇန်နဝါရီ ၅ ရက်)နံနက်ပိုင်းက ထီးချိုင့်မြို့နယ် မြတောင်လမ်းဆုံ၌ ကားတစ်စီးဖြင့် “ပုံပါစာရွက်” အများအပြားကြဲချသွား ခြင်းဖြစ်သည်။

“စာရွက်တွေကို ကားပေါ်ကနေ စစ်တပ်ယူနီဖောင်းနဲ့ လာချသွားတာ။ချက်ခြင်းတော့ မကောက်ရဲသေးဘူး။ သူတို့ ထွက်သွားပြီး ခပ်လှမ်းလှမ်းမှ သွားကောက်ကြတာ။စစ်ခွေးတွေ ယုတ်မာကြတော့မယ်”ဟု ထီးချိုင့်မြို့ ဒေသခံတစ်ဦးက ပြောသည်။

Public Service Announcement

လက်ရှိ စာအရ ဆိုလျှင် အောင်သာယာ၊ပေါက်နက်၊ချိတ်သင် ၊ရွာသစ်ကုန်း၊တုံလုံ၊ကြက်တကောင်၊အင်ဒေါင်း၊ကမ်းနီ၊ကိုးတဲ၊ကျစ်ကြီး၊နန်းပေါင်း၊ဟင်္သာစသည့် ရွာများ အရေးပေါ် ပြင်ဆင်ထားရန်လိုအပ်ကြောင်းလည်း ထီးချိုင့်မြို့ ပြည်သူ့တပ်ဖွဲ့သတင်းထောက်ပို့ တစ်ဦးကအသိ ပေးသည်။

“အဲဒီနယ်မြေတွေမှာ ပြည်သူ့တပ်ဖွဲ့တွေ အုပ်စိုးနိုင်နေတော့ စစ်ခွေးတွေက နယ်မြေရှင်းချင်တဲ့သဘောပဲ။ ဘာပဲဖစ်ဖြစ် သတိဆိုတာ ပိုတယ် မရှိဘူး။မနေ့က(ဇန်နဝါရီ ၄ ရက်) ထီးချိုင့် မြို့အစပ် က ဂဟဲရွာကို ရဟတ်ယာဥ်သုံးပြီး တိုက်ခိုက်ခဲ့တာကိုပဲ ကြည့်ရင်သိနိုင်တယ်”ဟု ၎င်းက ပြောသည်။

အာဏာသိမ်းစစ်ကောင်စီတပ်သည် ဇန်နဝါရီ ၄ရက် နေ့လယ် ၁၂နာရီခန့်က ရဟတ်ယာဉ်ဖြင့်တိုက်ခိုက်ခဲ့ရာ အင်းတော်နှင့် ထီးချိုင့်နယ်စပ်ရှိ ဂဟဲရွာအတွင်း ကျရောက်ပြီး အမျိုးသမီးတစ်ဦးသေဆုံးကာ အများအပြားဒဏ်ရာရရှိခဲ့ကြောင်း၊ နေအိမ်အချို့လည်း မီးလောင်ခဲ့သည်။

ဒေသခံများထွက် ပြေးတိမ်ရှောင်နေရမှုကြောင့်အသေးစိတ်ပျက်စီးဆုံးရှုံးမှုကို မသိရသေးဘဲ အင်းတော်-ထီးချိုင့် မြို့နယ်ကြားတွင် စစ်ကောင်စီတပ်က အင် အား ၁၀၀ ခန့်ဖြင့် ခြေ လျင်စစ်ကြောင်းထိုးခြင်းနှင့် ရွာများအတွင် တပ်စွဲမှုအချို့ပါရှိနေသည်။