ချင်းနှင့်စစ်ကိုင်းအစပ်တွင်တိုက်ပွဲပြင်းထန်

ချင်းပြည်နယ်၊ ဖလမ်းမြို့နယ်၊ ဝေဘူလမြို့သို့ ဦးတည်၍ စစ်ကြောင်းထိုးလာသည့် အကြမ်းဖက်စစ်ကောင်စီတပ်ဖွဲ့များကို ဒေသခံကာကွယ်ရေးတပ်ဖွဲ့ ငါးဖွဲ့ ပူးပေါင်း၍ ခုခံတိုက်ခိုက်နေပြီးတိုက်ပွဲပြင်းထန်နေသည်။

အကြမ်းဖက်စစ်ကောင်စီတပ်သားများသည် ကလေးမြို့နယ်၊ နတ်ချောင်းရွာဘက်မှ စစ်ကြောင်းထိုးတက်လာခြင်းဖြစ်ပြီး ၎င်းစစ်ကြောင်းများကို ဒေသခံကာကွယ်ရေးတပ်များဖြစ်သည့် PDF(ကလေး) ၊ဖလန်းအခြေစိုက် CNDF၊ PDF(ဇိုမီး)၊ ရိမ်းဂျားကလေးမြို့ပြည်သူကာကွယ်ရေးတပ်ဖွဲ့ (RKDF)နှင့် ပြည်သူကာကွယ်ရေးအဖွဲ့ ( ပ.က.ဖ -ကလေး) တို့ကပူး​ပေါင်း၍ လမ်းကြောင်းတလျှောက်တိုက်ခိုက်​နေခြင်းဖြစ်သည်။

တိုက်ပွဲအတွင်း နည်းပညာတက္ကသိုလ်(ကလေး)တွင် တပ်ဆွဲထားသည့် အကြမ်းဖက်စစ်ကောင်စီတပ်များက အဝေးပစ်အမြှောက်လက်နက်ကြီးများဖြင့် ပစ်ခတ်လျက်ရှိ​ကြောင်းဒေသခံကာကွယ်ရေးတပ်ဖွဲ့များကထုတ်ပြန်သည်။

တိုက်ပွဲပြင်းထန်နေခြင်းကြောင့် ကလေး-ဂန့်ဂေါလမ်းပိုင်းကို ပြည်သူများ အသွားအလာမလုပ်ရန် ဒေသခံကာကွယ်ရေးတပ်ဖွဲ့များကအသိ့​ပေးထားသည်။

Public Service Announcement

“စစ်တပ်က နတ်ချောင်းရွာထဲမှာတော့ စစ်ကြောင်းစထွက်ကတည်း ရမ်းသန်းပစ်နေတာ။ တွေ့တဲ့လူကို ပစ်သတ်သွားတယ်”ဟုဒေသခံတစ်ဦးကပြောသည်။

ကလေးမြို့နယ် နတ်ချောင်းရွာတွင် တပ်စွဲထားသော အကြမ်းဖက်စစ်ကောင်စီ တပ်ဖွဲ့များကို ဒေသခံကာကွယ်ရေးတပ်ဖွဲ့များက ခုခံတိုက်ခိုက်ခဲ့သည့် ဒီဇင်ဘာ ၂၆ ရက်မှစတင်ပြီး ကလေးမြို့တောင်ပိုင်းတွင် တိုက်ပွဲများမကြာခဏဖြစ်ပွားနေခြင်းဖြစ်သည်။ တိုက်ပွဲများတွင် စစ်​ကောင်စီတပ် ​သေဆုံး၊ဒဏ်ရာရမှုများလာချိန်များတွင်​လေ​ကြောင်းမှပြည်သူများကိုပါမ​ရှောင် စစ်​ကောင်စီတပ်ကပစ်ခတ်​လေ့ရှိသည်။

ထိုကာလအတွင်း အကြမ်းဖက်စစ်ကောင်စီတပ်ဖွဲ့များက နတ်ချောင်း၊ ချောင်းခွ၊ ဟားခါးလေး၊ ရေစို နှင့် ပန်းမွန်ချောင်း ကျေးရွာများတွင် ပြည်သူများကို ဖမ်းဆီးသတ်ဖြတ်ခြင်း၊ နေအိမ်များမီးရှို့ဖျက်စီးခြင်း၊ အကြမ်းဖက်လုယက်ခြင်းများ ပြုလုပ်ခဲ့သည်။