အကြမ်းဖက်စစ်ကောင်စီတပ်က လက်နက်ကြီး ပစ်ခတ်မှုကြောင့် လွိုင်ကော်မြို့ပေါ်တွင် နေအိမ်များထိခိုက်သည့်အပြင် အပြစ်မဲ့ပြည်သူ ငါးဦး သေဆုံးခဲ့ကြောင်း ကနဦးသတင်းရရှိသည်ဟု တိုးတက်သောကရင်နီပြည်သူ့အင်အားစု(PKPF)က ယနေ့ညပိုင်း၌ ထုတ်ပြန်သည်။
PKPF၏ ယနေ့နံနက် ထုတ်ပြန်ချက်များအရ ထိခိုက်ဒဏ်ရာရသူ လေးဦးထက်မနည်းရှိခဲ့ပြီး ညနေပိုင်း အခြေ အနေများကို စုံစမ်းနေဆဲဖြစ်သည်။
မြို့တွင်းတိုက်ပွဲဖြစ်ပွားနေသည့် လွိုင်ကော်မြို့တွင် စစ်ကောင်စီတပ်က ယနေ့(ဇန်နဝါရီ ၇ရက်)နံနက် အစောပိုင်းကတည်းက လက်နက်ကြီးများဖြင့် မြို့ပေါ်သို့ ရမ်းသန်းပစ်ခတ်နေသည်ဟု ဆိုသည်။
ထိုသို့ တိုက်ပွဲဖြစ်ပွားခြင်းနှင့် လက်နက်ကြီးများရမ်းသမ်းပစ်ခတ်ခြင်းကြောင့် ပိတ်မိနေသည့် ပြည်သများကို သွားရောက်ကယ်ဆယ်သည့် ကျောင်းဆရာတစ်ဦးလည်း အသက်ဆုံးရှုံးခဲ့ရကြောင်း PKPFက ဆိုသည်။
ယနေ့ လွိုင်ကော်၊ ဒီးမော့ဆိုနှင့် ဖရူဆိုဒေသများ၌ စစ်ဆင်ရေးလုပ်ဆောင်နေသည့် စစ်ကောင်စီတပ်သည် အဝေးပစ် ၁၂၀(မမ) လက်နက်ကြီးများ၊အမြောက် တင့်ကားတို့ကိုသုံးပြီး ရဟတ်ယာဉ် ထောက်ပို့ဖြင့် တိုက်ခိုက်ခဲ့ကြောင်း ကရင်နီအမျိုးသားတိုးတက်ရေးပါတီ(KNPP)၏သတင်းနှင့် ပြန်ကြားရေးဌာန KNICက ဖော်ပြသည်။
ထို့ပြင် စစ်ကောင်စီတပ်သည် ကရင်နီတပ်မတော်(KA) ဌာနချုပ်အနီးရှိ တပ်စခန်းများကို တိုက်လေယာဉ် နှစ်စီး၊ ရဟတ်ယာဉ် တစ်စီးတို့ဖြင့် လာရောက်တိုက်ခိုက်ခဲ့ ကြောင်း ထုတ်ပြန်ခဲ့သည်။
စစ်ကောင်စီတပ်မှလက်နက်ကြီးများ ပစ်ခတ်၍ လွိုင်ကော်မြို့တွင် ပိတ်မိနေသူများစွာရှိနေပြီး ပြည်သူများ ထိခိုက်ဒဏ်ရာရရှိမှု ရှိနေကြောင်း၊ ကယ်ဆယ်ရေးအဖွဲ့များ၏ စာရင်းအရ အာဏာသိမ်းပြီးနောက်ပိုင်းမှ လက်ရှိအချိန်ထိ ကရင်နီဒေသ၌လူဦးရေ နှစ်သိန်းခန့် စစ်ဘေးရှောင်နေကြရပြီဖြစ်သည်ဟု ဆိုသည်။