နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ပုဒ်မ ၃ ခုနဲ့ ဒီနေ့မှာ စစ်ကောင်စီက ထောင်ဒဏ် ၄ နှစ်ထပ်ချလိုက်ပါတယ်။
အဲဒီပုဒ်မတွေကတော့ ဆက်သွယ်ရေးဥပဒေပုဒ်မ ၆၇ အတွက် ထောင်ဒဏ် ၁ နှစ် ၊ ပို့ကုန်သွင်းကုန်ဥပဒေ ပုဒ်မ ၈ အတွက် ထောင်ဒဏ် ၂ နှစ် နဲ့ သဘာဝဘေးအန္တရာယ်စီမံခန်ခွဲမှု ဥပဒေပုဒ်မ ၂၅ အတွက် ထောင်ဒဏ် ၂ နှစ်စီချလိုက်တာပါ။
စုစုပေါင်း ထောင်ဒဏ် ၅ နှစ်ဖြစ်ပေမယ့် ဆက်သွယ်ရေးဥပဒေ နဲ့ ပို့ကုန်သွင်းကုန်ဥပဒေ တို့နဲ့စွဲထားတဲ့အမှုတွေကို တပေါင်းတည်းကျခံရမှာဖြစ်တာကြောင့် ဒေါ်အောင်ဆန်းစုကြည်ကို ဒီနေ့ချလိုက်တဲ့ ထောင်ဒဏ်ဟာ ၄ နှစ်ဖြစ်သွားတယ်လို့ တရားရုံးနဲ့နီးစပ်သူတွေထံက သိရပါတယ်။
ဒီနေ့အမိန့်ချတဲ့အမှု ၃ မှုဟာ ရွေးကောက်ပွဲအကြိုကာလမှာ နေပြည်တော်က NLD ပါတီဝင်တွေ နေအိမ်ကိုသွားရောက်တာ ကိုဗစ်စည်းကမ်းချိုးဖောက်တယ်ဆိုကာ သဘာဝဘေးအန္တရာယ်စီမံခန့်ခွဲမှုဥပဒေပုဒ်မ ၂၅ နဲ့စွဲဆိုတဲ့အမှု ၊ အာဏာသိမ်းတဲ့နေ့က နေပြည်တော်က နေအိမ်မှာ တရားမဝင် စကားပြောစက်တွေ့တယ်ဆိုကာ ပို့ကုန်သွင်းကုန်ဥပဒေအပြင် ဆက်သွယ်ရေးဥပဒေတွေနဲ့စွဲဆိုထားတဲ့အမှုတွေဖြစ်ပါတယ်။
စစ်ကောင်စီဟာ ဒေါ်အောင်ဆန်းစုကြည်ကို ဒီနေ့ချတဲ့ ထောင်ဒဏ်အပါအဝင် စုစုပေါင်း ထောင်ဒဏ် ၆ နှစ်ချထားပြီဖြစ်ပါတယ်။
ဒါပေမယ့် ဒေါ်အောင်ဆန်းစုကြည်အပေါ် စစ်ကောင်စီ ဆက်လက်စွဲဆိုထားတဲ့အမှုဟာ အမှု ၇ မှုကျန်နေသေးပါတယ်။