ကချင်ပြည်နယ် မန်စီမြို့နယ်တွင် ကချင်လွတ်လပ်ရေးတပ်မတော်(KIA)နှင့် အာဏာသိမ်းစစ်ကောင်စီတပ်တို့ ယမန်နေ့က တိုက်ပွဲဖြစ်ပွားခဲ့ကြောင်း KIAသတင်းနှင့် ပြန်ကြားရေးဌာနက သတင်းဖော်ပြသည်။
KIA တပ်မဟာ(၃)၊ တပ်ရင်း (၂၇) နယ်မြေအတွင်း ဝင်ရောက်လာသည့် စစ်ကောင်စီတပ်များကို ဇန်နဝါရီ ၂၅ရက် မွန်းလွဲ ၂နာရီခန့်က တိုက်ပွဲဖြစ်ခဲ့သည်ဟု ဆိုသည်။
မန်စီမြို့နယ် ဘလောင်ဒိန်ဆာရွာသို့ ရောက်ရှိနေသည့် စစ်ကောင်စီတပ် ခလရ (၂၂၃) အင်အား ၁၀၀ ခန့်ပါသည့် တပ်ဖွဲ့များက စက်ယန္တရားများသုံးပြီးလမ်းဖောက်လုပ်ကာ နယ်ချဲ့ဝင်ရောက်လာ၍ KIAက ခုခံတိုက်ခိုက်ခဲ့သည်ဟု ဖော်ပြသည်။
တိုက်ပွဲမှာ ၃နာရီကြာမြင့်ခဲ့ပြီး စစ်ကောင်တပ်များ ဆုတ်ခွာသွားကြောင်း၊ လက်ရှိအချိန်ထိ ဒေသတွင်းရှိ ကျေးရွာအချို့၌ စခန်းချထားပြီး ယနေ့နံနက် ၁၀နာရီမှစ၍ တိုက်ပွဲဖြစ်ရာသို့ လက်နက် ကြီးများ ပစ်ခတ်လျက်ရှိသည်ဟု ဆိုသည်။
KIAနှင့် စစ်ကောင်စီတပ်တို့သည် ဇန်နဝါရီ ၁၈ရက်ကလည်း မန်စီမြို့နယ်အတွင်း၌ မိနစ် ၄၀ကြာ တိုက်ပွဲဖြစ်ပွားခဲ့သည်။ ယင်းနေ့၌ပင် စစ်ကောင်စီတပ်က KIA တပ်မဟာ(၈)နယ်မြေသို့ တိုက်လေယာဉ်ဖြင့် ဗုံးကြဲတိုက်ခိုက်ခဲ့ပြီး တပ်မဟာ(၉)နယ်မြေသို့လည်း လက်နက်ကြီးများဖြင့် ပစ်ခတ်ခဲ့သည်။
အဆိုပါ တိုက်ပွဲဖြစ်စဉ်များအတွင်း နှစ်ဖက်ထိခိုက်ကျဆုံးမှုရှိမရှိကိုမူ KIA သတင်းနှင့် ပြန်ကြားရေးဌာနက ဖော်ပြမထားပေ။