အကြမ်းဖက်စစ်ကောင်စီတပ်သားများက ထန်တလန်မြို့ပေါ်ရှိနေအိမ်များကို ထပ်မံမီးရှို့ ဖျက်ဆီးလိုက်၍ ဇန်နဝါရီလကုန်ပိုင်းနှင့် ဖေဖော်ဝါရီ ၁ရက်အတွင်း အိမ်ခြေ ၉၀ကျော် မီးလောင်ပျက်စီးခဲ့သည်ဟု ထန်တလန် စစ်ရှောင်များနေရာချထားရေးကော်မတီ (TPAC-IDPs)က ထုတ်ပြန်သည်။
ထန်တလန်တွင် ၂၀၂၁ စက်တင်ဘာလဆန်းပိုင်းမှစ၍ စစ်ကောင်စီတပ်များက မီးရှို့၍ အိမ်ခြေများ မီးလောင်ခဲ့ရာ ဒီဇင်ဘာလကုန်အထိ ၁၈ကြိမ်ထက်မနည်း မီးရှို့ခံရပြီး ဘာသာရေးဆိုင်ရာအဆောက်အအုံ ၃၀ ခန့်အပါအဝင် အိမ်ခြေ ၆၉၀မီးလောင်ခဲ့သည်ဟု ဆိုသည်။
ဇန်နဝါရီ ၃ရက်မှ ၅ရက်အထိ နောက်ထပ် အိမ်ခြေ၁၅၁ လုံး မီးရှို့ခံခဲ့ရပြီး ဇန်နဝါရီ ၃၀၊ ၃၁ရက်နှင့် ဖေဖော်ဝါရီ ၁ရက်များတွင် စစ်ကောင်စီတပ်သားများက ထန်တလန်မြို့ပေါ် နေအိမ်များကို ထပ်မံမီးရှို့ခဲ့ရာ ခရစ်ယာန်ဘုရားကျောင်း အပါအဝင် အိမ်ခြေ ၉၄လုံး မီးလောင်ပြာကျခဲ့သည်ဟု TPAC-IDPsက ထုတ်ပြန်သည်။
ပြီးခဲ့သည့် ရက်ပိုင်း၌ စစ်ကောင်စီတပ်များက ထပ်မံမြို့ရှိ နေအိမ်များကို ထပ်မံမီးရှို့ဖျက်ဆီးခဲ့သည်ကို အတည်ပြု၍ရကြောင်း ချင်းအမျိုးသားတပ်ဦး (CNF) ပြောရေးဆိုခွင့်ရှိသူ ဆလိုင်းထက်နီက ပြောသည်။
“ကျွန်တော်တို့ကတော့အရေအတွက် အတိအကျမပြောနိုင်ပေမယ့် နယ်ခံတွေပြောတာက ဖြစ်နိုင်ခြေရှိပါတယ် ၉၀ ကျော်ဆိုတာ။ အားလုံးဆို စက်ဘာကနေစရင်တော့ ၉၀၀ ကျော်ရှိပြီပေါ့”ဟု ၎င်းက ဆိုသည်။
ထန်တလန်မြို့နယ်တွင် ယမန်နေ့က တိုက်ပွဲဖြစ်ခဲ့ရာ စစ်ကောင်စီတပ်မှ လေးဦးထက်မနည်း သေဆုံးခဲ့ကြောင်း၊ လက်ရှိတွင် ချင်းပြည်နယ်၌ ချင်းကာကွယ်ရေးတပ် (CDF)တပ်များရှိမည်ဟု ယူဆသည့် နေရာဒေသများကို စစ်ကောင်စီတပ်မှ တပ်အင်အားများဖြန့်ထားသည်ကို တွေ့ရကြောင်း ဆလိုင်းထက်နီက ပြောသည်။