စစ်ကိုင်းတိုင်း၊ မြင်းမူမြို့နယ်၊ မုံရွာ-မန္တလေးလမ်းပေါ်တွင် ကျန်းမာရေးကားနှစ်စီးဖြင့် သွားလာနေသော အကြမ်းဖက်စစ်ကောင်စီတပ်များအား မိုင်းခွဲတိုက်ခိုက်ရာ သေဆုံးထိ့ခိုက်မှုများနိုင်ကြောင်း ပြည်သူ့ကာကွယ်ရေးအဖွဲ့-မြင်းမူက သတင်းထုတ်ပြန်သည်။
ဖေဖော်ဝါရီလ (၂) ရက်နေ့ ညနေ (၂:၄၀) မိနစ်အချိန်က စစ်ကိုင်းတိုင်း၊ မြင်းမူမြို့မှ မုံရွာမြို့သို့ ကျန်းမာရေးကားနှစ်စီးအား အသုံးပြု၍ သွားလာနေသော စစ်ကောင်စီတပ်များအား မြင်းမူမြို့နယ် ၊ဂွေးပင်တောကျေးရွာနှင့် ရေပိုးစားရွာကြားတွင် မိုင်းခွဲတိုက်ခိုက်ခဲ့ကြောင်း မြင်းမူ PDFက အသိပေးသည်။
မိုင်းခွဲခံရချိန်တွင် ကားနှစ်စီးအနက် တစ်စီးမှာအပိုင်းအစများလွင့်စင်၍ပျက်စီးသွားရာ စစ်ကောင်စီတပ်သားများသေဆုံးမှုများနိုင်သည်ဟုသိရကြောင်း၊ အကြမ်းဖက်သမားများဘက်မှ လက်နက်များဖြင့် တရစပ် ပစ်ခတ်လျက်ရှိနေသော်လည်း PDF ရဲဘော်များအန္တရာယ်ကင်း ဘေးရှင်းစွာ ပြန်လည်ဆုတ်ခွာနိုင်ခဲ့ကြောင်း မြင်းမူ PDFက ပြောသည်။
မြင်းမူလျှပ်စီးပြောက်ကျားအဖွဲ့ ၊ မြောင်မြို့နယ်ပြည်သူ့ကာကွယ်ရေးနှင့် လုံခြုံရေးအဖွဲ့-CDSOM ၊ Black Eagle Defence Force-MMU၊ Myin Mu Defence Force-MMDF နှင့် People’s Defence Force Myinmu-MMUPDF မဟာမိတ်(၅)ဖွဲ့တို့မှ ပူးပေါင်းတိုက်ခိုက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြသည်။
ထိုအပြင် မြင်းမူ PDF အပါအဝင် မဟာမိတ်အဖွဲ့များမှာ ယနေ့နံနက်က ပျူစောထီးစခန်း သုံးခုကိုသွားရောက်တိုက်ခိုက်ပြီး ပျူစောထီးတပ်ဖွဲ့ဝင်များထွက်ပြေးသဖြင့် လက်နက်အချို့ရရှိခဲ့ကာ စခန်းများကိုမီးရှို့ဖျက်ဆီးခဲ့သည်။
မြင်းမူ PDFနှင့်မဟာမိတ်အဖွဲ့များသည် ယမန်နေ့ညနေကလည်း ပျူစောထီးစခန်းအားဝင်ရောက်တိုက်ခိုက်ခဲ့သေးသည်။