ကရင်နီပြည်နယ် လွိုင်ကော်မြို့ စံပြသုံးမိုင် ပကြဲကျေးရွာအတွင်း အကြမ်းဖက်စစ်ကောင်စီတပ်က အပြစ်မဲ့ အရပ်သားပြည်သူနှစ်ဦးအား မီးရှို့သတ်ဖြတ်ခဲ့သည့်ဖြစ်စဉ်နှင့်ပတ်သက်၍ အမှုဖွင့်လှစ်ထားပြီး သက်ဆိုင်ရာ အဖွဲ့များနှင့် စုံစမ်းစစ်ဆေးလျက်ရှိကြောင်း ကရင်နီပြည်ရဲဌာန(KSP)က ထုတ်ပြန်သည်။
ဖေဖော်ဝါရီ ၁၀ရက်က ပကြဲကျေးရွာအနီးတွင် တိုက်ပွဲဖြစ်ပွားခဲ့ရာ အကြမ်းဖက်စစ်ကောင်စီတပ်ဘက်မှ နေအိမ်များကို မီးရှို့ကာ အပြစ်မဲ့ ပြည်သူနှစ်ဦးကို မီးရှို့ သတ်ဖြတ်ခဲ့ကြောင်း စုံစမ်းသိရှိရသည်ဟု ဆိုသည်။
ဖြစ်စဉ်နှင့်ပတ်သက်၍ အကြမ်းဖက်စစ်ကောင်စီ တပ်များမှ မြို့နယ်ရပ်ကွက်၊ ကျေးရွာများအတွင်း ဝင်ရောက်လာချိန်တွင် နေအိမ်များကို ဖျက်ဆီးခြင်း၊ မီးရှို့ခြင်း၊ အပြစ်မဲ့အရပ်သား ပြည်သူများအားသတ်ဖြတ်ခြင်းများ ကျူးလွန်လျက်ရှိကြောင်း စုံစမ်းစစ်ဆေးတွေ့ရှိရကြောင်း ထုတ်ပြန်ထားသည်။
ထို့ကြောင့် လွိုင်ကော်မြို့ စစ်ရှောင်လျက်ရှိသော ရပ်ကွက်များအတွင်း ပြည်သူများအနေဖြင့် သွားလာမှုများ အထူးဂရုစိုက်သွားလာကြရန် တိုက်တွန်းကြောင်း KSPက ထုတ်ပြန်သည်။
Public Service Announcement
