တစ်သင်းလုံးနီးပါး ကိုဗစ်ကူးစက်ခံရတဲ့အတွက် အာဆီယံဘောလုံးအဖွဲ့ချုပ်က ကြီးမှူးကျင်းပတဲ့ AFF U23 ဘောလုံးပြိုင်ပွဲကနေ မြန်မာအသင်းနုတ်ထွက်လိုက်တယ်လို့ အသင်းရဲ့နည်းပြ ပိုပေါ့က သူရဲ့ဖေ့ဘွတ်ခ်ကနေအသိပေးထားပါတယ်။
ကစားသမား ၂၆ ဦးမှာ ၅ ဦးသာ ကျန်းမာရေးကောင်းပြီး ကျန်သူတွေဟာ ကိုဗစ်ကူးစက်ခံရတာ ၊ ကိုဗစ် လက္ခဏာ ခံစားနေရတယ်လို့ မြန်မာအသင်း နည်းပြပို့ပေါ့က ရေးသားထားပါတယ်။
ဒီလိုအခြေအနေမှာ ကစားသမားတစ်ဦးချင်းစီရဲ့ အသက်ဟာ ဘောလုံးပွဲစဉ်တွေထက် အရေးကြီးတာကြောင့် ပြိုင်ပွဲကနေ နုတ်ထွက်လိုက်တာလို့သိရပါတယ်။
AFF U 23 ပြိုင်ပွဲကို ဖေဖော်ဝါရီလ ၁၄ ရက်ကနေ ဖေဖော်ဝါရီလ ၂၆ ရက်အထိ ကမ္ဘောဒီးယားနိုင်ငံမှာကျင်းပမှာပါ။
ဒီပြိုင်ပွဲမှာ မြန်မာအသင်းဟာ အုပ်စု ခ မှာ မလေးရှား ၊ အင်ဒိုနီးရှား ၊လာအိုတို့နဲ့အတူကျရောက်နေပါတယ်။
မြန်မာအသင်းဟာ ဗွေဆော်ဦး ပွဲမတိုင်ခင်မှာ နုတ်ထွက်သွားတာပါ။
ဒီပြိုင်ပွဲဟာ အာဆီယံအလှည့်ကျ ဥက္ကဋ္ဌ ကမ္ဘောဒီးယားနိုင်ငံ ၊ ဖနွမ်းပင်မှာ ကျင်းပနေတာဖြစ်ပါတယ်။
စစ်ကောင်စီဟာ မကြာခင် ဖနွမ်းပင်မှာ ကျင်းပမယ့် အာဆီယံ နိုင်ငံခြားရေးဝန်ကြီး အစည်းအဝေးကိုတက်ခွင့်မရဘဲ နိုင်ငံရေးအရကိုယ်စားမပြုသူကိုသာ တက်ခွင့်ပြုလို့ အဖွဲ့ဝင်နိုင်ငံအချို့နဲ့လည်းမကျေမလည်ဖြစ်နေတာပါ။
အစည်းအဝေးကို တက်ခွင့်မရတဲ့အတွက် နိုင်ငံရေးအရ ကိုယ်စားပြုသူလည်းမလွှတ်တော့ဘူးလို့ စစ်ကောင်စီရဲ့ နိုင်ငံခြားရေးဌာနက မနေ့ကသဘောထားထုတ်ပြန်ထားတာရှိပါတယ်။
မြန်မာဘောလုံးပရိသတ်ကတော့ စစ်ကောင်စီလက်အောက်မှာ နိုင်ငံကို ကိုယ်စားပြုပြီးသွားရောက်ယှဉ်ပြိုင်တဲ့ ပွဲစဉ်တွေကို အားမပေးကြတော့ပါဘူး ။
ကစားသမားအချို့ကလည်း စစ်ကောင်စီကိုဆန့်ကျင်တဲ့အနေနဲ့ သွားရောက်ယှဉ်ပြိုင်ဖို့အတွက် ငြင်းဆန်ကြတာတွေရှိနေပါတယ်။