နှစ်ရက်ဆက် တမူးတိုက်ပွဲတွင် စစ်​ကောင်စီတပ် ၁၀ဦး​သေ

တမူးတွင် နှစ်ရက်ဆက် တိုက်ပွဲအတွင်း စစ်ကောင်စီဘက်က ဆယ်ဦးသေဆုံးခဲ့ပြီး တိုက်ပွဲအရှိန်မြင့်လာနေ၍ သေနတ်ကျည်ဖိုးလိုအပ်နေ​ကြောင်း တမူးပြည်သူ့ကာကွယ်ရေးအဖွဲ့က​ ပြောသည်။

တမူးမြို့မှ ကလေးမြို့သို့အထွက်(၃)မိုင်အကျော်ရှိ အစိုးရနည်းပညာအထက်တန်းကျောင်း(GTHS) ကျောင်းအတွင်း တပ်စွဲထားသည့် အကြမ်းဖက်စစ်ကောင်စီတပ်ကို ပြည်သူ့ကာကွယ်ရေးအဖွဲ့များက ဖေဖော်ဝါရီ ၁၆ ရက်တွင်​ ဝင်​ရောက်တိုက်ခိုက်ရာမှ နှစ်ရက်ဆက်တိုက်ပွဲ ဖြစ်ပွားခဲ့ခြင်းဖြစ်သည်။

ဖေဖော်ဝါရီ ၁၆ ရက်တိုက်ပွဲတွင် စစ်ကောင်စီဘက်က လေးဦးသေဆုံးခဲ့ပြီး အထိနာခဲ့သဖြင့် စစ်ကောင်စီက ဖေဖော်ဝါရီ ၁၇ ရက်တွင် လက်နက်ကြီးများအသုံးပြု၍ တိုက်ခိုက်ခဲ့​ကြောင်း တမူးပြည်သူ့ကာကွယ်ရေးအဖွဲ့ဖြစ်သော People’s Defense Force – တမူးတပ်ရင်း(၄) (TSG)က သတင်းထုတ်ပြန်သည်။

ဖေဖော်ဝါရီ ၁၇ ရက်တွင် လက်နက်ကြီး အကြိမ် ၅၀ ထက်မနည်းအသုံးပြုတိုက်ခိုက်ခဲ့ရာ နေ့လယ် ၁၂ နာရီခန့်မှ ညနေအထိကြာမြင့်ခဲ့ပြီးစစ်ကောင်စီတပ်ဖွဲ့ဝင် ခြောက်ဦးထပ်မံသေဆုံးကာ ပြည်သူ့ကာကွယ်ရေး(တမူး)တပ်ဖွဲ့ဝင်အချို့ထိခိုက် ဒဏ်ရာရရှိခဲ့​ကြောင်း ပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောသည်။

Public Service Announcement

“တိုက်ပွဲတွေကဆက်ဖြစ်လာဖို့ရှိတယ်လို့ ကျွန်တော်တို့ တွက်ဆထားတယ်။ ဒါကြောင့်ကျွန်တော်တို့ကျည်ဖိုးလိုအပ်တယ်လို့ မိဖပြည်သူတွေကို အသိပေးပါရစေ” ဟု ၎င်းကဆက် ပြောသည်။