စစ်ကိုင်းတိုင်း ပုလဲမြို့နယ်ရှိ ချောင်းဦးရွာကို အကြမ်းဖက်စစ်ကောင်စီတပ်ကရွာလုံးကျွတ် မီးရှို့ ဖျက်ဆီးနေကြောင်း ဒေသခံပြည်သူများက လူထုနွေဦးသို့ပြောသည်။
ထို့အပြင် ပုလဲဒေသခံတပ်ဖွဲ့များအတွက် ထောက်ပံ့မှုများဆောင်ရွက်နေသည်ဟု စွပ်စွဲခံထားရသော ကျေးရွာ ၁၀ရွာကို အကြမ်းဖက်စစ်တပ်က မီးရှို့ရန် ပစ်မှတ်ထားနေသည်ဟုလည်း ၎င်းတို့က ဆိုသည်။
“ဒီမနက် ၉ နာရီကတည်းက ချောင်းဦးရွာထဲ သေနတ်ဖောက်ဝင်လာတာ။ပြီးတော့ ချောင်းဦးရွာထဲ မီးခိုးတွေ ထွက်လာတာပဲ”ဟု ချောင်းဦးရွာချင်းစပ်နေသည့် မင်းတိုင်ပင်ရွာသားတစ်ဦးက ပြောသည်။
လက်ရှိ မြေပြင်ဓာတ်ပုံမှတ်တမ်းများအရ ရွာလုံးကျွတ်နီးပါး မီးလောင်နေပြီ ချောင်းဦးရွာနေပြည်သူများမှာ ယနေ့ နံနက် အစောပိုင်းအချိန်ကတည်းက ထွက်ပြေးတိမ်းရှောင်နေခဲ့ရသည်။
Public Service Announcement
အကြမ်းဖက်စစ်တပ်က ၎င်းတို့အား အထိနာအောင်တိုက်ခိုက်နိုင်သည့် ပုလဲမြို့နယ်ကို အငြိုးထား၍ ယခုလဆန်းပိုင်းကစ၍ ရွာလုံးကျွတ်မီးရှို့ မှုများ စတင်ပြုလုပ်ခဲ့ခြင်းဖြစ်သည်။
ထိုအနက် မင်းတိုင်ပင်၊ အင်မထီး၊ မွေ့တုံ၊ ပန်းရွာ၊ ကိုင်းတွင်း နှင့် လှော်ကားကြီး ရွာတို့မှ အိမ်ခြေ ၁,၀၀၀ကျော်ကို အကြမ်းဖက်စစ်တပ်က မီးရှို့ခဲ့ကာ ဒေသခံ ထောင်နှင့်ချီ စစ်ဘေးတိမ်းရှောင်နေရဆဲ ဖြစ်သည်။
