ချင်းအမျိုးသားရေးစိတ်ဓာတ်ကို အမြင့်ဆုံးမြှင့်တင်ကာ ချင်းပြည်တည်ဆောက်ရေးနှင့် ဖက်ဒရယ်ပြည်ထောင်စုတည်ဆောက်ရေးအောင်မြင်သည်အထိကြိုးပမ်းဖော်ဆောင်ရန် ချင်းအမျိုးသား တပ်ဦး(CNF)က တိုက်တွန်းထုတ်ပြန်သည်။
ယနေ့ကျရောက်သော (၇၄)နှစ်မြောက် ချင်းအမျိုးသားနေ့ထုတ်ပြန်ချက်၌ ယခုအချိန်သည် အကြမ်းဖက်စစ်တပ်ကြောင့် ချင်းလဲန်းပြည်သူလူထုတရပ်လုံး အတိဒုက္ခရောက်နေသည့်အချိန်ဖြစ် သောကြောင့် ချင်းအမျိုးသားရေးစိတ်ဓာတ်ကို အမြင့်ဆုံးသို့ မြှင့်တင်ရမည်ဟု CNF က ဖော်ပြသည်။
ချင်းပြည်နယ်သူလူထု၏ အဓိကလုပ်ငန်းကြီးသုံးရပ်မှာ အာဏာရှင်စနစ်ချုပ်ငြိမ်းရေး၊ ချင်းပြည်တည်ဆောက်ရေးနှင့် ဖက်ဒရယ်ပြည်ထောင်စုတည်ဆောက်ရေးတို့ ဖြစ်ကြောင်း CNF ကပြောသည်။
စစ်အာဏာရှင်စနစ်အပါအဝင် မည်သည့်အာဏာရှင် စနစ်ကိုမဆိုဆန့်ကျင်ပြီး ပြည်ထောင်စုတည်ထောင်ခဲ့သူများ၏ မျှော်မှန်းချက်အောင်မြင်ပြီးမြောက်သည်အထိ တိုက်ပွဲဝင်ကြရမည်ဟု CNF က တိုက်တွန်းသည်။
Public Service Announcement
“ချင်းပြည်သူ့တော်လှန်ရေးအင်အားစုများကို စုစည်း၍ အာဏာရှင်စနစ်ကို ပြည်သူ့အင်အားဖြင့် ချုပ်ငြိမ်းစေရမည်ဖြစ်သည်”ဟု CNF က ဆိုသည်။
ထို့အပြင် ချင်းလဲန်း၏ နိုင်ငံရေး၊ လုံခြုံရေး၊ စီးပွားရေး၊ လူမှုရေးနှင့် ယဉ်ကျေးမှုကဏ္ဍအရပ်ရပ်ကို ချင်းလဲန်းပြည်သူများကိုယ်တိုင် ကိုယ်ထူကိုယ်ထတည်ဆောက်ကြရမည်ဖြစ်ပြီး ချင်းအမျိုးသားတပ်ဦး၊ ချင်းအမျိုးသားတပ်မတော်(CNF/CNA)၊ ကြားကာလချင်းအမျိုးသားအတိုင်ပင်ခံကောင်စီ(ICNCC)၊ ချင်းလဲန်းပူးတွဲကာကွယ်ရေးကော်မတီ(CJDC)တို့နှင့်အတူ ပူးပေါင်းဆောင်ရွက်ကြမည်ဟု တိုက်တွန်းထားသည်။
ဖက်ဒရယ်ပြည်ထောင်စုတည်ဆောက်ရေးလုပ်ငန်းများတွင်လည်း ပြည်သူများသည် အမျိုးသားညီညွတ်ရေးအတိုင်ပင်ခံကောင်စီ(NUCC)၊ အမျိုးသားညီညွတ်ရေးအစိုးရ (NUG) နှင့် ဗဟိုကွပ်ကဲ ရေးနှင့် ပေါင်းစပ်ညှိနှိုင်းရေးကော်မတီ(C3C)တို့နှင့် ပူးပေါင်းဆောင်ရွက်ကြမည်ဟု ဆက်လက် တိုက်တွန်းသည်။
