ICJ၌ မြန်မာ-ဂမ်ဘီယာအမှု ကြားနာမှုများ အန္တရာယ်ရှိကြောင်း SAC-M ထုတ်ပြန်

အပြည်ပြည်ဆိုင်ရာတရားရုံး(ICJ)၌ မြန်မာ-ဂမ်ဘီယာအမှုနှင့်ပတ်သက်၍ ကြားနာမှုများသည် မြန်မာနိုင်ငံအခြေအနေကို ပိုမိုဆိုးရွားစေနိုင်သော အန္တရာယ်ရှိပြီး တရားမျှတမှုအတွက် မလိုအပ်သောကြန့်ကြာမှုများဖြစ်ကြောင်း အထူးအကြံပေးကောင်စီ(SAC-M)က ထုတ်ပြန်သည်။

အကြမ်းဖက်စစ်ကောင်စီကို ICJ သို့ တက်ရောက်ခွင့်ပေးခဲ့ခြင်းသည် စိတ်ပျက်ဖွယ်၊ တာဝန်မဲ့ဆုံးဖြတ်ချက်ဖြစ်ပြီး တရားမျှတမှုအတွက် မလိုအပ်ဘဲ ကြန့်ကြာစေမည်ဖြစ်ကြောင်း ကုလသမဂ္ဂကျွမ်းကျင်ပညာရှင်များဖြင့် ဖွဲ့စည်းထားသော SAC-M ၏ ယနေ့(ဖေဖော်ဝါရီ ၂၁ ရက်)ထုတ်ပြန်ချက်၌ ဖော်ပြသည်။

“အာဏာသိမ်းစစ်ကောင်စီဟာ မြန်မာနိုင်ငံရဲ့အစိုးရမဟုတ်ပါဘူး။ စစ်ကောင်စီဟာ မြန်မာနိုင်ငံကို ကိုယ်စားမပြုပါဘူး။ အခုလိုကိုယ်စားပြုခွင့်ပေးခဲ့တာဟာ ICJ အတွက် အန္တရာယ် ရှိပါတယ်”ဟု SAC-M အဖွဲ့ဝင် Chris Sidoti က ပြောသည်။

စစ်ကောင်စီခေါင်းဆောင်များသည် ယခုအမှု၏ အဓိကအချက်ဖြစ်သည့် ရိုဟင်ဂျာများအပေါ် လူမျိုးသုဉ်းသတ်ဖြတ်မှုမြောက်သော ရက်စက်ယုတ်မာမှုများကို ကျူးလွန်ခဲ့ကြပြီး လက်ရှိနိုင်ငံအတွင်းဖြစ်ပေါ်ခံစားနေရသော အကြမ်းဖက်မှုများ၏ အကြောင်းရင်းခံများဖြစ်သည်ဟု SAC-Mက ဆိုသည်။

Public Service Announcement

ထို့အပြင် အမျိုးသားညီညွတ်ရေးအစိုးရ(NUG)ကသာ မြန်မာနိုင်ငံကို ကိုယ်စားပြုရန် အခွင့်အာဏာရှိပြီး NUG သည် ကနဦးကန့်ကွက်ချက်များကို ပြန်လည်ရုတ်သိမ်းကြောင်း ရုံးတော်သို့လျှောက်ထားပြီးဖြစ်ကြောင်း SAC-M အဖွဲ့ Yanghee Leeက ပြောသည်။

ICJ အနေဖြင့် ယမန်နှစ်တွင် ကုလသမဂ္ဂအထွေထွေညီလာခံက အာဏာသိမ်းစစ်ကောင်စီကို ငြင်းပယ်ကာ ကိုယ်စားပြုမှုမပေးခဲ့ခြင်းကို ထည့်သွင်းစဉ်းစားရန်လိုအပ်ကြောင်း SAC-Mက ထောက်ပြသည်။

ကုလသမဂ္ဂညီလာခံသည် ရွေးကောက်ခံအရပ်သားအစိုးရခန့်အပ်ခဲ့သော မြန်မာသံအမတ်ကြီး ဦးကျော်မိုးထွန်းကို ဆက်လက်အသိအမှတ်ပြုခန့်အပ်ခဲ့သည်။

သံအမတ်ကြီး ဦးကျော်မိုးထွန်းကို NUGက ICJ မြန်မာကိုယ်စားလှယ်အဖြစ်တာဝန်ပေးကြောင်း ကြေညာခဲ့သည်။