စစ်အာဏာရှင်စနစ် အမြစ်ပြတ်တိုက်ဖျက်ရေးကို ရရာနည်းလမ်းပေါင်းစုံဖြင့် ပြင်းပြင်းထန်ထန် တိုက်ပွဲဝင်ကြရန် ဗမာနိုင်ငံလုံးဆိုင်ရာကျောင်းသား သမဂ္ဂများအဖွဲ့ချုပ်(ဗကသ)က ယနေ့ သတင်းထုတ်ပြန်သည်။
ရန်ကုန်မြို့ မရမ်းကုန်းမြို့နယ်၌ ဗကသရဲဘော်များ အကြမ်းဖက်ပစ်ခတ် ဖမ်းဆီးခံမှုဖြစ်စဉ်နှင့် ပတ်သက်၍ သတင်းထုတ်ပြန်ရာတွင် ဖော်ပြခြင်းဖြစ်ပြီး ဖက်စစ်တပ်၏ ဝါဒဖြန့်မီဒီယာ များတွင် ဖော်ပြနေသကဲ့သို့ အပြန်အလှန်ပစ်ခတ်ခြင်းမဟုတ်ဘဲ ဖက်ဆစ်တပ်က တဖက်သတ် အကြမ်းဖက် ပစ်ခတ်ဖမ်းဆီးခံရခြင်းဖြစ်သည်ဟု ထုတ်ပြန်သည်။
ဖေဖော်ဝါရီ ၂၅ ရက်က ဖက်ဆစ်တပ်၏ အထက်ပါအကြမ်းဖက်ပစ်ခတ် ဖမ်းဆီးမှုတွင် ဗကသရဲဘော် ၈ ဦး ဖမ်းဆီးခံခဲ့ရပြီး အခြေခံပညာ ကျောင်းသားများသမဂ္ဂ၏ ဥက္ကဌဟောင်း ကိုဖုန်းဝေယံကျော် (ခ) ကိုညီမင်းသူမှာ ရင်ညွန့်တွင် ကျည်ဆန်ထိမှန်ကာ နေရာ၌ပင် ကျဆုံးခဲ့ရသည်။
ထို့အပြင် အကြမ်းဖက်ပစ်ခတ်ဖမ်းဆီးခံရသော ဗကသရဲဘော်အားလုံးသည် အသက် ၁၈ နှစ်ပင် မပြည့်သေးသော အခြေခံပညာအလယ်တန်း၊အထက်တန်းကျောင်းများမှ ကျောင်းသား၊ ကျောင်းသူများဖြစ်ပြီး ကျဆုံးသွားသည့်ရဲဘော် ကိုဖုန်းဝေယံကျော်၏ ရုပ်အလောင်းကို ဖက်ဆစ်တပ်မှ ထုတ်ယူခွင့်မပေးဘဲ အလောင်းကို ဖျောက်ဖျက်ပစ်လိုက်သည်ဟု ဗကသများ အဖွဲ့ချုပ်က ထုတ်ပြန်သည်။
Public Service Announcement
ပြည်သူလူထုအနေဖြင့်လည်း စစ်အာဏာရှင်စနစ် အမြစ်ပြတ်တိုက်ဖျက်ရေး၊ ပြည်သူ့ဒီမိုကရေစီအရေးအတွက် ဘုံရန်သူဖြစ်သည့် စစ်အာဏာရှင်စနစ် (စစ်သုံးစစ်) အား ထိရောက်မှန်ကန်သည့် ရရာနည်းလမ်းပေါင်းစုံဖြင့် ပြင်းပြင်းထန်ထန် တိုက်ပွဲဝင်ကြရန် လေးနက်စွာတိုက်တွန်းနှိုးဆော်ကြောင်း ဗကသများအဖွဲ့ချုပ်က ထုတ်ပြန်သည်။
