နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို အဂတိပုဒ်မနဲ့စွဲချက်တင်ထားတဲ့အမှုအတွက် ဦးဖြိုးမင်းသိန်း နဲ့ ဇနီး ကို ပြန်ခေါ်သက်သေအဖြစ် ဒီနေ့မှာစစ်ဆေးခဲ့တယ်လို့သိရပါတယ်။
ဒီအမှုဟာ ဖမ်းဆီးခံထားရတဲ့ ဦးဖြိုးမင်းသိန်းရဲ့ ထွက်ဆိုချက်ကိုအကြောင်းပြပြီး ဒေါ်အောင်ဆန်းစုကြည်ကို စစ်ကောင်စီက ထောင်ဒဏ် ၁၅နှစ်ထိ ချလို့ရတဲ့ အဂတိပုဒ်မနဲ့ တရားစွဲဆိုထားတာပါ။
ပြီးခဲ့တဲ့ရက်သတ္တပတ်ကတော့ အဲဒီအမှုမှာ စွဲဆိုထားတဲ့ ပုဒ်မနဲ့ပဲ ဒေါ်အောင်ဆန်းစုကြည်ကို စွဲချက်တင်ဖို့ တရားရုံးက ဆုံးဖြတ်ခဲ့ပါတယ်။
စွဲချက်တင်ခံရတဲ့ ရုံးချိန်းမှာ ဒေါ်အောင်ဆန်းစုကြည်ဟာ သူ့မှာ အပြစ်မရှိကြောင်း ထွက်ဆိုသလို ဦးဖြိုးမင်းသိန်း ၊ ဇနီး ဒေါ်ခင်မိမိကြွယ် ၊တရားစွဲဆိုတဲ့ အဂတိကော်မရှင်က ပုဂ္ဂိုလ် အပါအဝင် လေးဦးကို ပြန်ခေါ်သက်သေအဖြစ် စစ်ဆေးပေးဖို့ တရားရုံးကို တင်ပြထားတာပါ။
Public Service Announcement
ဒီနေ့မှာတော့ အဲဒီ ပြန်ခေါ်သက်သေ လေးဦးကို စစ်ဆေးခဲ့တယ်လို့သိရပါတယ်။
ဒေါ်အောင်ဆန်းစုကြည်ရဲ့ ရှေ့နေတွေကို စစ်ကောင်စီက မီဒီယာ ဖြေဆိုခွင့် ပိတ်ပင်ထားတာကြောင့် ဒီနေ့စစ်ဆေးချက် တွေကို မသိရပါဘူး။
ဦးဖြိုးမင်းသိန်းဟာ ဝန်ကြီးချုပ်တာဝန်ယူချိန် ရန်ကုန်တိုင်းထဲက ဆောင်ရွက်ချက်တွေကို ထောက်ခံပေးဖို့အတွက် ဒေါ်အောင်ဆန်းစုကြည်ကို အမေရိကန်ဒေါ်လာ ၆ သိန်းနဲ့အကယ်ဒမီရွှေ ၇ ပိသာ ပေးခဲ့တယ်လို့ ထွက်ဆိုထားတာပါ။
ဒီလို ထွက်ဆိုထားတဲ့ ရုပ်သံဖိုင်ကို စစ်ကောင်စီက သတင်းစာရှင်းလင်းပွဲမှာ ဖွင့်ပြသလို နေပြည်တော်က တရားခွင်မှာ လည်း ဦးဖြိုးမင်းသိန်းက အဲဒီ ရုပ်သံဖိုင်ထဲက အတိုင်းထွက်ဆိုထားခဲ့ပါတယ်။
ဒေါ်ခင်မိမိကြွယ်ဟာလည်း သူရဲ့ခင်ပွန်း ဦးဖြိုးမင်းသိန်းရဲ့တောင်းဆိုချက်အရ ဒေါ်လာနဲ့ရွှေတွေပြင်ဆင်ပေးခဲ့ရတယ်လို့ တရားခွင်မှာ တရားလိုပြသက်သေအဖြစ် လာရောက်ထွက်ဆိုထားတာရှိပါတယ်။
ဒေါ်အောင်ဆန်းစုကြည်ကတော့ ဦးဖြိုးမင်းသိန်း တရားခွင်မှာ ထွက်ဆိုချိန်ကတည်းက စွပ်စွဲချက်တွေဟာ အခြေအမြစ်မရှိဘူးလို့ ရှေ့နေတွေကို ပြောပြခဲ့တာရှိပါတယ်။
