လျှပ်စစ်ဓာတ်အားထုတ်လုပ်မှုလျော့ကျလာမည့်ဖြစ်၍ နိုင်ငံအတွင်းနေရာအချို့တွင် တစ်ပတ်ကြာ ၂၄ နာရီလုံးလျှပ်စစ်မီးပြတ်တောက်မည်ဟုကြေငြာခဲ့ပြီးနောက် တစ်ရက်အကြာတွင် စစ်ကောင်စီက ၂၄နာရီလုံးမပျက်တော့ဘဲ အချို့နေရာများ၌ အချိန်ပိုင်းအလိုက်ပေးမည်ဟု ပြန်လည်ပြင်ဆင်ထုတ်ပြန်သည်။
ရခိုင်ကမ်းလွန်ရှိ ရွှေသဘာဝဓာတ်ငွေ့စီမံကိန်းတွင် ပိုက်လိုင်းအသစ်ချိတ်ဆက်ခြင်းကြောင့် လျှပ်စစ်ဓာတ်အားထုတ်လုပ်မှု ၃၃၄ မဂ္ဂါဝပ်လျော့ကျခြင်းအပါအဝင် ဓာတ်အားစနစ်အတွင်း မဂ္ဂါဝပ်၁၃၀၄ လျော့ကျသွားမည်ဖြစ်၍ မတ်လ ၁၂ ရက်မှ မတ်လ၁၈ ရက်အတွင်း နေရာအချို့တွင် ၂၄ နာရီလုံးလျှပ်စစ်မီးဖြတ်တောက်ရခြင်းဖြစ်သည်ဟုအကြမ်းဖက် စစ်ကောင်စီ၏လျှပ်စစ်နှင့်စွမ်းအင်ဝန်ကြီးဌာနက မတ် ၆ရက်တွင်ကြေညာခဲ့သည်။
သို့သော် ပြည်သူများကပြင်းထန်စွာဝေဖန်မှုများထွက်ပေါ်လာပြီးနောက်တစ်ရက်အကြာ မတ် ၇ ရက်တွင် ဓာတ်အားလျော့နည်းချိန်၌ အချို့သောနေရာများတွင် အပိုင်းလိုက်၊အချိန်ပိုင်းအလိုက် ဖြန့်ဖြူးပေးမည်ဖြစ်ကြောင်း ပြန်လည်ကြေညာခဲ့သည်။
“အဲ့နေ့မှာ အပိုင်းလိုက်၊ အချိန်ပိုင်းပဲပေးမယ်တော့ ဒီရက်တွေကော မီးက အချိန်ပြည့်လာလို့လား၊ အခုလည်း တစ်ရက်ကို ၁၀နာရီလောက်ပဲလာတာကိုး”ဟု ရန်ကုန်မြို့နေပြည်သူတစ်ဦးက ပြောသည်။
၂၄ နာရီမီးပြတ်တောက်မည်ဟုကြေညာပြီး ၂၄ နာရီမဟုတ်ဘဲ အချိန်ပိုင်းသာမီးပြတ်တောက်မည်ဟုပြောင်းလဲ ထုတ်ပြန်သဖြင့် ပြည်သူများက မူလကြေညာထားသလို တစ်ရက်လုံးမပျက်၍ တော်သေးသည်ဆိုသော စိတ်ခံစားချက်ဝင်လာစေရန် အကြမ်းဖက်စစ်ကောင်စီက ၎င်းတို့လုပ်ရိုးလုပ်စဥ်အတိုင်းဝါဒဖြန့်မှု တစ်ခုသာဖြစ်ကြောင်းဝေဖန်မှုများလည်းရှိသည်။ ယခုအခါနိုင်ငံတစ်ဝန်မီးပြတ်တောက်မှု ဆိုးရွားစွာကြုံနေ၍ နိုင်ငံမှာ နှစ် ၂၀ကျော် နောက်ပြန်ရောက်သွားကြောင်းပြည်သူ့အချို့က ပြောသည်။
စစ်တပ်က နိုင်ငံတော်အာဏာကို အဓမ္မသိမ်းယူပြီးနောက် နိုင်ငံအတွင်း လျှပ်စစ်ဓာတ်အားပေးစနစ်ပျက်စီးပြိုလဲလာခဲ့သည်။ စစ်တပ်အာဏာမသိမ်းခင်အချိန်က နိုင်ငံအတွင်း လျှပ်စစ်ထုတ်လုပ်နိုင်မှုသည် မဂ္ဂါဝပ် ၄၂၀၀ရှိပြီး စစ်တပ်အာဏာသိမ်းပြီး ၂၁၇၇ မဂ္ဂါဝပ်သာ ထုတ်လုပ်နိုင်တော့သည်ဟု စစ်ကောင်စီဝန်ကြီးဌာနက ဝန်ခံထုတ်ပြန်ထားသည်။
လက်ရှိအချိန်တွင် တစ်နိုင်ငံတွင် လျှပ်စစ်သုံးစွဲမူသည် နေ့ဘက်တွင် မဂ္ဂါဝပ် ၃၄၀၀ရှိပြီး ညဘက်တွင် မဂ္ဂါဝပ် ၃၆၀၀ရှိသည်။ ထုတ်လုပ်မူနှင့် သုံးစွဲခြင်းမလုံလောင်ခြင်းကြောင့် အလှည့်ကျမီးပေးစနစ်ကို ကျင့်သုံးနေရသည်ဟု ဆိုသည်။
စစ်ကောင်စီ၏ အဆိုအရ ယခင်အရပ်သားအစိုးလက်ထက်တွင် အကောင်အထည်ဖော်ခဲ့သည့် မဂ္ဂါဝပ် ၇၅၀ထွက်သည့် LNG ဓာတ်အားပေးစက်ရုံနှစ်ခုတွင်LNGဈေးနှုန်းမြင့်တက်လာခြင်းကြောင့် ရပ်တန့်ထားသည်ဟုဆိုသည်။ သို့သော် LNG ဓါတ်အားပေးစက်ရုံများကို စစ်ကောင်စီက ပိုက်ဆံမပေးတော့သဖြင့် ရပ်နားသွားခြင်းဖြစ်ကြောင်း People’s Spring က စုံစမ်းသိ့ရသည်။ ထို့ကြောင့် စစ်ကောင်စီက အာဏာသိမ်းပြီးနောက် လက်နက်များဝယ်ယူရန် ၊အာဏာသိမ်းခေါင်းဆောင် မင်းအောင်လှိုင်အတွက် ဗိုလ်ရှုသဘင်ကျင်းပရန် စသည်တို့တွင် ငွေများစွာအကုန်အကျခံသော်လည်း လျှပ်စစ်မီးပေးရန်အတွက် အကုန်အကျများစွာ မခံသည်ကို တွေ့ရသည်။
ဓာတ်အားလိုင်းများပြတ်တောက်ခြင်းကြောင့် ဘီလူးချောင်းရေအားလျှပ်စစ်စီမံကိန်းမှဓာတ်အား မဂ္ဂါဝပ် ၂၂၀ ကို မဟာဓာတ်အားလိုင်းသို့မပိုနိုင်ဟုလည်းဆိုထားသည်။ ထိုအပြင် ယခုအခါ ရွှေသဘာဝဓာတ်ငွေ့စီမံကိန်းတွင် အသစ်ထွက်လာသည့် သဘာဝဓာတ်ငွေ့တွင်းဖြင့် ပိုင်းလိုင်းချိတ်ရန်အတွက် ဓာတ်ငွေ့ထုတ်လုပ်မှုခေတ္တရပ်ဆိုင်းမည်ဟုဆိုပြန်သည်။ထိုကြောင့် မဂ္ဂါဝပ် ၃၃၄ ထပ်မံလျော့နည်းမည်ဟုစစ်ကောင်စီကဆိုသည်။ စသည်တို့ကြောင့် ပုံမှန်ထုတ်လုပ်မှုထက် ဓာတ်အား ၁၃၀၄ မဂ္ဂါဝပ် လျော့နည်းနေကြောင်းစစ်ကောင်စီက ထုတ်ပြန်ထားသည်။
သို့သော်ထိုအချက်များသည်စစ်ကောင်စီကဆင်ခြေပေးသည့် အချက်များဖြစ်ပြီး ၎င်းတို့တွင် ပြည်သူလူထုအတွက် ငွေကြေးပေးရန် စိတ်ဆန္ဒမရှိခြင်းကြောင့် ဓာတ်အားစီမံကိန်းများကို ရပ်တန့်ပစ်ခြင်းကြောင့်ဖြစ်သည်ဟုစွမ်းအင်ပညာရှင်များက ထောက်ပြထားသည်။