ရာထူးအာဏာကိုအလွဲသုံးစားလုပ်တဲ့အပြင် လာဘ်ငွေယူတယ်ဆိုကာ မန္တလေး တိုင်းဝန်ကြီးချုပ် ဒေါက်တာဇော်မြင့်မောင်အပေါ် စစ်ကောင်စီက အဂတိတိုက်ဖျက်ရေးဥပဒေ ပုဒ်မ ၅၅ နဲ့စွဲဆိုထားတဲ့အမှု ၅ မှုလုံးကို ဒီနေ့မှာ စွဲချက်တင်လိုက်တယ်လို့သိရပါတယ်။
အဂတိပုဒ်မ ၅၅ ဟာ ထောင်ဒဏ် ၁၅ နှစ်ထိချလို့ရတာကြောင့် ဒေါက်တာဇော်မြင့်မောင်ကို အဂတိမှုနဲ့ပဲ စုစုပေါင်း ထောင်ဒဏ် နှစ် ၇၀ ကျော် ချလို့ရအောင်စစ်ကောင်စီက စီစဉ်နေတာပါ။
အဂတိမှုနဲ့ စွဲချက်တင်တဲ့အပေါ် ဒေါက်တာဇော်မြင့်မောင်က အပြစ်မရှိကြောင်း တရားခွင်မှာထုချေပါတယ်။
ဒေါက်တာဇော်မြင့်မောင်ဟာ စီးပွားရေးလုပ်ငန်းရှင် မောင်ဝိတ်ရဲ့ထွက်ဆိုချက်နဲ့ပတ်သက်ပြီး အဂတိအမှု ၂ မှု ၊ အလားတူ အခြားစီးပွားရေးလုပ်ငန်းရှင်တစ်ဦးရဲ့ ထွက်ဆိုချက်နဲ့အဂတိ ၁ မှု ၊ မြင်းခြံနဲ့ ပြင်ဦးလွင် NLD ရုံးတွေ တည်ဆောက်တာနဲ့ပတ်သက်ပြီး အဂတိ ၂ မှု စုစုပေါင်းအဂတိ ၅ မှုနဲ့ စစ်ကောင်စီရဲ့တရားစွဲခြင်းခံထားရတာပါ။
Public Service Announcement
ဒါအပြင် ရွေးကောက်ပွဲမလျော်သြဇာ သုံးမှုနဲ့လည်းတရားစွဲထားပါသေးတယ်။
လက်ရှိအချိန်မှာလည်း ဒေါက်တာဇော်မြင့်မောင်ကို စစ်ကောင်စီဟာ ဆူပူအောင်လှုံဆော်မှု နဲ့ထောင်ဒဏ် ၂ နှစ် ၊ ကိုဗစ်စည်းကမ်းချိုးဖောက်မှု နဲ့ ထောင်ဒဏ် ၂ နှစ် စုစုပေါင်းထောင်ဒဏ် ၄ နှစ်ချထားပြီး မန္တလေး အိုးဘိုထောင်မှာ ချုပ်နှောင်ထားတာပါ။
ဒီနေ့ စွဲချက်တင်တဲ့ တရားခွင်မှာ ထွက်ဆိုတဲ့ ဒေါက်တာဇော်မြင့်မောင်ဟာကျန်းမာရေးကောင်းမွန်ပုံရတယ်လို့ တွေ့မြင်လိုက်ရသူတွေကပြောပြပါတယ်။
