ဒီမိုကရေစီတိုက်ပွဲဝင်နေကြသည့် မြန်မာအမျိုးသမီးများ၏ ရဲရင့်မှုများကို ဗြိတိန်သံရုံးချီးကျူး

မြန်မာနိုင်ငံတွင် ဒီမိုကရေစီတိုက်ပွဲဝင်နေကြသည့် မြန်မာအမျိုးသမီးများ၏ ရဲရင့်မှုများသည် လေးစားအားကျဖွယ်ကောင်းကြောင်း ဗြိတိန်သံရုံး ဒုတိယသံအမတ် ရုသ်ဘရက်ဒလေဂျုံးစ်က ပြောကြားသည်။

ယနေ့(မတ်လ ၈ ရက်)ကျရောက်သော အပြည်ပြည်ဆိုင်ရာ အမျိုးသမီးများနေ့တွင် မြန်မာအမျိုးသမီးများသည် ကြံ့ကြံ့ခံနိုင်စွမ်းရှိပြီး ပြောင်းလဲမှုများအတွက် ခေါင်းဆောင်နိုင်စွမ်းရှိသည်ဆို သော သက်သေများပင်ဖြစ်ကြောင်း အထက်ပါ မြန်မာနိုင်ငံဆိုင်ရာဗြိတိန်သံရုံး ဒုတိယသံအမတ်ကပြောသည်။

“မြန်မာနိုင်ငံမှာ စစ်တပ်အာဏာသိမ်းပြီးချိန်မှစပြီး မြန်မာအမျိုးသမီးတွေဟာ နိုင်ငံရေး၊ စီးပွားရေး၊ လူမှုရေးနဲ့ ကျန်းမာရေး အစရှိတဲ့ အခက်အခဲ များစွာကို ရင်ဆိုင်ကြုံတွေ့နေရတယ်ဆိုတာ ကျွန်မနားလည်မိပါတယ်”ဟု ရုသ်ဘရက်ဒလေဂျုံးစ်က မြန်မာဘာသာဖြင့်ပြောဆို အားပေးသည်။

မြန်မာနိုင်ငံဆိုင်ရာ အမေရိကန်သံရုံးကလည်း ယနေ့နံနက်ပိုင်းတွင် မမြသွဲ့သွဲ့ခိုင်၊ မအိန်ဂျယ်ကြယ်စင်၊ မခင်မျိုးချစ် အပါအဝင် လွန်ခဲ့သည့်တစ်နှစ်အတွင်း ကြွေလွင့်ခဲ့ရသည့် အမျိုးသမီးများနှင့် မိန်းကလေးများအားလုံးကို အောက်မေ့ဂုဏ်ပြုကြောင်း ထုတ်ပြန်ထားသည်။

Public Service Announcement