စက်သုံးဆီ​၊ ​ဒေါ်လာ​၊​ ရွှေ​ဈေး အပြိုင်ထပ်တက်

ပြည်တွင်းတွင်စက်သုံးဆီ၊ရွှေနှင့်ဒေါ်လာဈေးများ မတ် ၈ ရက်တရက်တည်းတွင် တရှိန်ထိုးမြင့်တက်လာသည်။

မတ် ၇ ရက်နှင့် နှိုင်းယှဉ်ပါကမတ်၈ ရက်တွင် စက်သုံးဆီဈေးမှာ တစ်လီတာလျှင် အနည်းဆုံး ကျပ် ၂၀၀​ကျော် ၊ ရွှေဈေးသည့် တစ်ကျပ်သားကို ကျပ် နှစ်သောင်းနှင့် ဒေါ်လာဈေးသည်လည်း တစ်ဒေါ်လာကို ကျပ် ၅၀ ခန့် ​ဈေးတက်ခဲ့သည်ဟု ဈေးကွက်အတွင်းမှာ စုံစမ်းသိရသည်။

ဒေါ်လာဈေးမှာ မတ် ၇ ရက် ညသန်းခေါင်ယံကပင်အဝယ်လိုက်နေပြီးမတ် ၈ရက်တွင် တစ်ဒေါ်လာကို ၂၀၅၀ကျပ်အထိမြင့်တက်ခဲ့သည်။

“မနေ့က သန်းခေါင်ယံလောက်ကတည်းက ဒေါ်လာကို လိုသလောက်လိုက်ဝယ်နေကြတာ၊ ဒီနေ့လဲ ဈေးတက်မယ်ဆိုတာ ကြိုသိတဲ့သူကသိနေကြတယ်။ ဒါကြောင့် ဒီနေ့ ဈေးကတက်လာတယ်။ ရှေ့ဆက် ဆက်တက်ဖို့ပဲရှိတော့တယ်”ဟု ငွေလဲကောင်တာပိုင်ရှင်တစ်ဦးကပြောသည်။

Public Service Announcement

စက်သုံးဆီဈေးမှာ မတ် ၇ ရက်တွင်အောက်တိန်း ၉၂ တစ်လီတာလျှင် ၁၉၃၀ကျပ်၊ အောက်တိန်း ၉၅ တစ်လီတာလျှင် ၁၉၉၅ ကျပ်၊ ဒီဇယ် တစ်လီတာလျှင် ၂၀၂၅ကျပ်နှင့် ပရီမီယံဒီဇယ်တစ်လီတာလျှင် ၂၀၃၅ကျပ်ရှိခဲ့သည်။

မတ် ၈ ရက်တွင် အောက်တိန်း ၉၂ တစ်လီတာ ၂၁၃၀ကျပ်၊ အောက်တန်း ၉၅ တလီတာ ၂၁၉၅ကျပ်၊ ဒီဇယ်တစ်လီတာ ၂၃၂၅ကျပ်နှင့် ပရီမီယံဒီဇယ် တစ်လီတာလျှင် ၂၃၃၅ကျပ်အထိ ပေါက်ဈေးရှိခဲ့သည်။ စက်သုံးဆီတစ်လီတာလျှင် ကျပ် ၂၀၀ မှ ကျပ် ၃၀၀ ကြားအထိ တစ်ရက်အတွင်းမြင့်တက်ခဲ့ခြင်းဖြစ်သည်။ လက်ရှိစက်သုံးဆီနှုန်းများမှာ သမိုင်းတစ်​လျှောက် အမြင့်ဆုံး​ဈေးဖြစ်သည်။

မကြာခင် စက်သုံးဆီပြတ်လပ်သွားနိုင်သည့်ဟူသော သတင်းများကြောင့် စက်သုံးဆီများကို တပိုင်တနိုင်ဝယ်ယူစုဆောင်းသူများရှိလာသည်ဟု စက်သုံးဆီဆိုင်မန်နေဂျာတစ်ဦးကပြောသည်။

“အာဏာကိုသာ လိုချင်ပြီး နိုင်ငံကို စီမံခန့်ခွဲအုပ်ချုပ်ဖို့ စွမ်းဆောင်ရည်မရှိလို့ ဒီလိုမျိုးကသောင်းကနင်းတွေဖြစ်နေတာ”ဟု စက်သုံးဆီဆိုင်မန်နေဂျာတစ်ဦးကပြောသည်။

ပြည်တွင်းရွှေဈေးမှာလည်း မတ် ၇ ရက်တွင် တစ်ကျပ်သားကို ၁၉၉၅၀၀၀ကျပ်မှ မတ် ၈ ရက်တွင် တစ်ကျပ်သားကို ၂၀၁၅၀၀၀ကျပ် အထိမြင့်တက်ခဲ့သည်။

ဒေါ်လာဈေးနှင့်ရွှေဈေးသည် ပြည်တွင်း နိုင်ငံရေးအခြေအနေနှင့် ကမ္ဘာ့စစ်ရေးအခြေအနေများကြောင့်ဆက်လက်မြင့်တက်နိုင်သည်ဟု ရွှေလုပ်ငန်းရှင်များကခန့်မှန်းထားကြသည်။

စက်သုံးဆီ​ဈေးမြင့်တက်မှု​ကြောင့်ကုန်​ဈေးနှူန်းများလည်းတစ်ရိတ်ရိတ်တက်လာပြီး စားသုံးဆီ​ဈေးမှာ တစ်ပိသာလျှင် ၈၀၀၀ ​ကျော်အထိ့​ဈေးတက်​နေ​သော်လည်း ဝယ်မရ​ကြောင်း မန္တ​လေးတိုင်းမှ ပြည်သူအချို့က​ပြောသည်။