▪️ပြည်သူများစစ်ကောင်စီအဆောက်အဦး၊ ဘန်ကာ၊ စစ်ကောင်စီလက်အောက်ခံအဖွဲ့အစည်းများနှင့် ဝေးဝေးမှ သွားလာကြရန် Dark Shadowအဖွဲ့ ပြော
ရန်ကုန်မြို့ အလုံမြို့နယ်ရှိ ယာဉ်ထိန်းရဲကင်းတဲ နှင့် စစ်ကောင်စီကို အခွန်ဆောင်နေသည့် SKYWAY Club နှင့် KTV ကို မိုင်းခွဲတိုက်ခိုက်ခဲ့ကြောင်း Dark Shadow အဖွဲ့က သတင်းထုတ်ပြန်သည်။
ယနေ့ (မတ်လ ၈ ရက်) ည ၈ နာရီခွဲခန့်တွင် အလုံမြို့နယ် ကမ်းနားလမ်းနှင့် အလုံလမ်းထောင့်ရှိ ယာဉ်ထိန်းရဲကင်းတဲ ၊ Control Box နှင့် အကြမ်းဖက်စစ်ကောင်စီကို ကျည်ဖိုးအဖြစ်ပြောင်းလဲစေကာ အခွန်ပေးဆောင်နေကာ Night Lifeများတွင် လူငယ်များကို မူးယစ်ဆေးဝါး၊အပျော်ပါးများဖြင့် တော်လှန်ရေး မပါဝင်အောင် အမျိုးမျိုးဆွဲဆောင်နေသော Clubနှင့် Barများထဲမှ SKYWAY CLUB & KTVကို တိုက်ခိုက်ခဲ့ကြောင်း အသိပေးထုတ်ပြန်ထားသည်။
“ပြည်သူများကို အကြမ်းဖက်စစ်ကောင်စီ အဆောက်အဦး၊ဘန်ကာ ၊ အဖွဲ့အစည်းများနဲ့ ဝေးဝေးကွာကွာမှ သွားလာကြဖို့နဲ့ တော်လှန်ရေးအင်အားပိုမိုကောင်းမွန်ဖို့ ပြည်သူ့ကာကွယ်ရေးတပ်ဖွဲ့များ မြို့ပြပြောက်ကျား တပ်ဖွဲ့များကို တတ်နိုင်တဲ့အားလေးနဲ့တော်လှန်ပါဝင်လှူဒါန်းပြီး ဂရုစိုက်ဖို့လေးပြောချင်ပါတယ်ဗျ “ဟု Dark Shadow မှ တာဝန်ရှိသူတစ်ဦးက People’s Springသို့ ပြော သည်။
တိုက်ခိုက်မှုတွင် Dark Shadow အဖွဲ့သားများအားလုံးဘေးအန္တရာယ်ကင်းရှင်းကြောင်းလည်း ၎င်းကဆက်ပြောသည်။
ထပ်မံ၍လည်း စစ်ကောင်စီထောက်တိုင်များ၊ အဖွဲ့အစည်းများနှင့် တော်လှန်ရေး အားနည်းအောင်ဆွဲဆောင်ပြုလုပ်ဖျက်ဆီးစေသောနေရာများကို ထိရောက်စွာတိုက်ခိုက်ချေမှုန်းမည်ဟု Dark Shadow အဖွဲ့က ထုတ်ပြန်ထားသည်။
မတ်လ ၈ ရက် နေ့လယ်ကလည်း စစ်ကောင်စီကို အခွန်ဆောင်ကာပျော်ပါးနေသည့် Brave Bar ကို Justice Bringer Force- JBF က ဗုံးခွဲတိုက်ခိုက်ခဲ့သည်။