ဇူလိုင်-၁၄၊၂၀၂၆။ရောင်နီ/People’s Spring
ရန်ကုန်မြို့၊ အလုံမြို့နယ်က ဆင်မင်းဈေးကားမှတ်တိုင်အနီးမှာ အသက်ကြီးပိုင်း အမျိုးသမီး ၁ဦး YBS-144 ယာဉ်တိုက်ပြီး သေဆုံးသွားတယ်လို့ အခင်းနေရာကို သွားရောက်ကူညီခဲ့တဲ့ ကြီးလေးကြီး လူမှူကူညီရေးအသင်းက အသိပေးထားပါတယ်။
ဒီနေ့ (ဇူလိုင်၁၄)မနက်က အောက်ကြည့်မြင်တိုင်လမ်းမပေါ် ဆင်မင်းဈေးမှတ်တိုင်မှာ ရပ်နေတဲ့ အသက်ကြီးပိုင်း အမျိုးသမီးကို YBS-144 က တိုက်ခဲ့တာဖြစ်ပြီး ကားအောက်ကိုရောက်နေတဲ့ အမျိုးသမီးကို ကယ်ဆယ်ကာ ရန်ကုန်ဆေးရုံကြီးကို ပို့ဆောင်ပေးခဲ့တယ်လို့ ကြီးလေးကြီးက အခင်းဓာတ်ပုံတွေနဲ့အတူ ထုတ်ပြန်ထားပါတယ်။
“အဖွားအိုအား ရန်ကုန်ပြည်သူဆေးရုံကြီးသို့ ပို့ဆောင်ရာတွင်ဆေးရုံ၌ ဆရာဝန်များစမ်းသပ်ရာ အသက်မပါကြောင်းသိရှိရပါသည် ။” လို့ အသိပေးထားပါတယ်။
Public Service Announcement
သေဆုံးသူရဲ့ ဖုန်းနဲ့မိသားစုကို ဆက်သွယ်ပြီး သေဆုံးသူရဲ့ ဖုန်းအပါအဝင် ပိုက်ဆံနဲ့ပစ္စည်းတွေကို မိသားစုကို အပ်နှံပေးခဲ့တယ်လို့ ကြီးလေးကြီးက ဆိုပါတယ်။
YBS-144 ယာဉ်တွေက အမောင်းကြမ်းပြီး အဲဒီ့နေရာက ယာဉ်တိုက်မှုတွေဖြစ်လေ့ရှိတယ်လို့ ဒေသခံတွေက ပြောပါတယ်။
“YBS ကားတွေ အတော်ဆိုးနေပြီ ။ထိရောက်စွာနဲ့ အရေးယူကြပါ။အဲနေရာ ခဏခဏ ဖြစ်တယ်နော်။ စိတ်မကောင်းဘူး ” လို့ ဒေသခံတစ်ဦးက မှတ်ချက်ရေးသားထားပါတယ်။
အာဏာသိမ်းစစ်တပ်ရဲ့လက်အောက်မှာ YBS ယာဉ်တွေက စည်းကမ်းပိုင်းလိုက်နာမှု အားနည်းသလို ကြပ်မတ်မှုတွေ မရှိတာကြောင့် ဒီလိုဖြစ်စဉ်တွေ ကြုံနေရတာလို့ ဒေသခံတစ်ဦးက သုံးသပ်ပါတယ်။
ဒီနေ့ မနက်က ရန်ကုန်မြို့ သိမ်ဖြူလမ်းနဲ့ ကုန်သည်လမ်းထောင့်မှာလည်း အောက်ဆိုက်ပြေးဆွဲတဲ့ လိုက်ထရပ်ယာဉ်တစ်စီးတိမ်းမှောက်တာကြောင့် ၄ ဦး ထိခိုက်ဒဏ်ရာရခဲ့ပါတယ်။
