အကြမ်းဖက်စစ်ကောင်စီတပ်သည် ယနေ့နံနက်ပိုင်းတွင်လည်း ဒီးမော့ဆိုမြို့နယ်ကို လေကြောင်းတိုက်ခိုက်မှု ဆက်လက် ပြုလုပ်ခဲ့ရာ ဘာသာရေးအဆောက်အအုံ အချို့ပျက်စီးခဲ့ကြောင်း ကရင်နီအဖွဲ့အစည်းအချို့က သတင်းထုတ်ပြန်ထားသည်။
ယနေ့(မတ်လ ၁၀ရက်) နံနက် ၆နာရီ မိနစ် ၂၀ခန့်မှစ၍ တိုက်လေယာဉ် နှစ်စီးဖြင့် ခြောက်ကြိမ် ဗုံးကြဲတိုက်ခိုက်ခဲ့ကြောင်း We Are KNDF စာမျက်နှာတွင် ဖော်ပြထားသည်။
တိုးတက်သော ကရင်နီပြည်သူ့အင်အားစု(PKPF)ကလည်း အဆိုပါ ဖြစ်စဉ်ကို သတင်းထုတ်ပြန်ထားရာ စစ်ကောင်စီတပ်၏ လေယာဉ်ဖြင့် ဗုံးကြဲတိုက်ခိုက်မှုကြောင့် ဒီးမော့ဆိုမြို့ ဒေါငံခါးရှိ အိုမင်းမစွမ်း သီလရှင်ကျောင်း ထိခိုက်ပျက်စီးခဲ့ကြောင်း ဖော်ပြထားသည်။
“ဗုံးကြဲခံရတာဟာ ရက်တိုင်းနီးပါးတိုက်ပွဲ မရှိတဲ့နေရာ၊စစ်ရှောင်စခန်းတွေရှိတဲ့နေရာ တွေကိုဗုံးကျဲတယ်၊ဒါတွေဟာ ကရင်နီမှာနေ့တိုင်းဖြစ်နေသလို နေ့ရက်တိုင်းမှာ ကျဆုံးသွားတဲ့ အာဇာနည်ရဲဘော်တွေမနည်းဘူး”ဟု KNDF တပ်ရင်း (၂)က ပြောသည်။
Public Service Announcement
အကြမ်းဖက်စစ်ကောင်စီတပ်သည် တိုက်ပွဲပြင်းထန်နေသည့် ကရင်နီဒေသအား လေကြောင်းတိုက်ခိုက်မှုများ ဆက်တိုက်ပြုလုပ်လျက်ရှိရာ အရပ်သားပြည်သူလူထုနှင့် စစ်ရှောင်များနေထိုင်ရာ နေရာများကိုပါ ပစ်မှတ်ထား တိုက်ခိုက်မှုများ မကြာခဏ ပြုလုပ်လျက်ရှိသည်။
မတ်လ၈ရက် နံနက်အစောပိုင်းကလည်း ဒီးမော့ဆိုမြို့နယ် ဆောင်ဒူလာကျေးရွာကို စစ်ကောင်စီတပ်က ဗုံးကြဲတိုက်ခိုက်ခဲ့၍ ဘုရားကျောင်းနှင့် နေအိမ်အချို့ ထိခိုက်ပျက်စီးခဲ့သည်။ အကြမ်းဖက်စစ်တပ်သည် စစ်ဘေးရှောင်ပြည်သူများနှင့် အရပ်သား ပြည်သူများသာ ခိုလှုံနေသည့် ဆောင်ဒူလာကျေးရွာအား ဗုံးကြဲတိုက်ခိုက်ခြင်းသည် အရပ်သားပြည်သူများကို ရည်ရွယ်ချက်ရှိရှိ ပစ်မှတ်ထား တိုက်ခိုက်ခြင်းဖြစ်ပြီး စစ်ရာဇဝတ်မှုကျူးလွန်ခြင်းဖြစ်ကြောင်း ကရင်နီအမျိုးသားများကာကွယ်ရေးတပ်(KNDF)က ထုတ်ပြန်ထားသည်။
ဒီးမော့ဆိုတိုက်ပွဲ၌ အထိနာသည့် စစ်ကောင်စီတပ်သည် လေကြောင်းတိုက်ခိုက်မှု၊ လက်နက်ကြီး၊ တင့်ကား၊ အတွဲလိုက်ပစ် ရော့ကဒ်ဒုံးများ အသုံးပြုတိုက်ခိုက်လျက်ရှိသည်ဟု KNDFက ဆိုသည်။
