အကြမ်းဖက်စစ်ကောင်စီတပ်နှင့် လက်အောက်ခံအဖွဲ့အစည်းများ၏ မီးရှို့မှုကြောင့်ပျက်စီးသွားသည့် လူနေအိမ်ပေါင်း ၇,၂၄၈ လုံးရှိနေပြီဖြစ်ကြောင်း Data For Myanmar က ယနေ့ထုတ်ပြန် သည်။
စစ်တပ်အာဏာသိမ်းသည့် ၂၀၂၁ ဖေဖော်ဝါရီ ၁ ရက်မှ ၂၀၂၂ မတ်လ ၁၅ ရက်အထိ နိုင်ငံတဝန်း နေရာပေါင်း ၂၀၁ နေရာခန့်တွင် အရပ်သားပြည်သူများ၏ နေအိမ်များကို အကြမ်းဖက်စစ်ကောင်စီတပ်ဖွဲ့ဝင်များက မီးရှို့ဖျက်ဆီးခဲ့ခြင်းဖြစ်ကြောင်း Data For Myanmar က ထုတ်ပြန်သည်။
“သတင်းမီဒီယာတွေမှာ ဖော်ပြခဲ့တဲ့ တိုက်ပွဲသတင်းတွေနဲ့ နေအိမ်မီးရှို့ခံရတဲ့ သတင်းတွေကို ရက်အလိုက်၊ ဖြစ်စဉ်အလိုက် ပြန်စီပြီးတော့ ရေတွက်ထားပါတယ်။ သတင်းဌာနတစ်ခုချင်းစီက မတူညီတဲ့ အရေအတွက်တွေကို cross-check လုပ်ပြီး စိစစ်ထားပါတယ်။ ဒေသခံ လူအခွင့်အရေးအဖွဲ့တွေနဲ့ စစ်ဘေးရှောင်တွေကို ကူညီပေးနေတဲ့ အဖွဲ့တွေက ထုတ်ပြန်တဲ့ စာရင်းတွေကို အခြေခံထားပါတယ်။ မပြည့်စုံတဲ့ အချက်အလက်တွေ ချန်ထားခဲ့ရလို့ မြေပြင်အရေအတွက်က ပိုများနိုင်ပါတယ်” ဟု Data For Myanmar က ဆိုသည်။
အများဆုံးမီးရှို့ဖျက်ဆီးခံရသည့်ဒေသမှာ စစ်ကိုင်းတိုင်းဖြစ်ပြီး လူနေအိမ် ၄,၄၂၆ လုံး မီးရှို့ခံခဲ့ရခြင်းဖြစ်သည်။ ယင်းနောက်တွင် မကွေးတိုင်းက ၁,၁၄၈ လုံး၊ ချင်းပြည်နယ်က ၁,၁၂၁ လုံးနှင့် ကရင်နီပြည်က ၃၅၇ လုံးဖြင့် အရပ်သားပြည်သူများ၏ နေအိမ်များ မီးရှို့ဖျက်ဆီးခံခဲ့ရသည်။
Public Service Announcement
ကရင်နီပြည်အတွက် အချက်အလက်များသည် ဖြစ်စဉ်တစ်ခုချင်း၊ ရက်အလိုက်မရရှိနိုင်သေးသည့်အတွက် ၂၀၂၁ ဒီဇင်ဘာထဲတွင် စာရင်းချုပ်အနေဖြင့် စုပေါင်းထည့်ထားရပြီး အမှန်တကယ်ဖြစ်ပွားသည့် ရှေ့ပိုင်းလများတွင် အရေအတွက်နည်းကာ ဒီဇင်ဘာလတွင် ပိုများနေခြင်းဖြစ်ကြောင်းလည်း Data For Myanmar က ရှင်းလင်းထားသည်။
