▪️အဆက်အသွယ်မရ၍ အသက်အန္တရာယ် ထိခိုက်မှုရှိမည်ကို မိသားစုဝင်များ စိုးရိမ်ပူပန်နေ
ရန်ကုန်မြို့ရှိ တော်လှန်သွေးမကုန် တောင်ဒဂုံသပိတ်အင်အားစုအဖွဲ့ဝင် လူငယ်နှစ်ဦးသည် ယမန်နေ့ (မတ်လ ၁၆) နံနက်ပိုင်းတွင် အကြမ်းဖက်စစ်ကောင်စီ၏ မတရားဖမ်းဆီးခြင်းခံရကြောင်း စစ်အာဏာရှင်ဆန့်ကျင်ရေး ရန်ကုန်အင်အားစု(AJAY)က ထုတ်ပြန်သည်။
အဆိုပါ လူငယ်နှစ်ဦးမှာ ကိုမင်းဟိန်းခန့်နှင့် မပိုးဇာအောင်တို့ဖြစ်ပြီး ၎င်းတို့နှစ်ဦးမှာ အလုပ်ကိစ္စဖြင့် အပြင်သို့သွားလာစဥ် စစ်ကောင်စီက အရပ်ဝတ်ဖြင့် ဖမ်းဆီးခဲ့ခြင်းဖြစ်ကြောင်း သပိတ်ပူးပေါင်းပါဝင်သူ လူငယ်တစ်ဦးက ပြောသည်။
“ကိုမင်းဟိန်းခန့်နဲ့ မပိုးဇာအောင်တို့ကို အလုပ်တစ်ခုနဲ့ အပြင် သွားရင်း အရပ်ဝတ်နဲ့ဖမ်းခံရတယ် ကြားတယ်။ ကိုမင်းဟိန်းခန့်ကို ဘယ်ကိုဖမ်းသွားမှန်း အခုထိ မသိရသေးဘူး။ မပိုးဇာအောင်ကတော့ ရွှေပြည်သာ စစ်ကြောရေး ရောက်နေပြီလို့ သိရပါတယ်”ဟု ၎င်းက ပြောသည်။
ဖမ်းဆီးခံ ကိုမင်းဟိန်းခန့်နှင့် မပိုးဇာအောင်တို့သည် လက်ရှိအချိန်ထိ မိသားစုနှင့်အဆက်အသွယ် လုံးဝမရသည့်အတွက် အလွန်စိုးရိမ်ပူပန်နေကြကြောင်း AJAY က ထုတ်ပြန်ထားသည်။
ထို့ကြောင့် ကိုမင်းဟိန်းခန့်နှင့် မပိုးဇာအောင်တို့သည်အသက်မပြည့်သေးသူများဖြစ်ကြသောကြောင့် အကြမ်းဖက်အုပ်စု၏ လူမဆန်စွာ ညှင်းပန်းနှိပ်စက်မှုကြောင့် အသက်အန္တရာယ်ထိခိုက်မှုရှိမည်ကို မိသားစုဝင်များမှ စိုးရိမ်ပူပန်နေကြကြောင်း ထုတ်ပြန်ချက်၌ ပါဝင်သည်။