အကြမ်းဖက်စစ်ကောင်စီတပ်၏ တင့်ကားနှစ်စီးပါ စစ်ယာဉ်တန်းသည် ကျောက်ထုမှ မင်းတပ်မြို့ဘက်သို့ ထွက်ခွာသွားကြောင်း မင်းတပ်မြို့နယ် ချင်းဒေသကာကွယ်ရေးတပ်(CDF) တာဝန်ရှိသူက အတည်ပြုသည်။
မတ်လ ၂၃ရက် နံနက်ပိုင်းတွင် ကျောက်ထုလေယာဉ်ကွင်းမှ မင်းတပ်မြို့သို့ တက်လာသည့် ယာဉ်အစီး ၈၀ကျော်ပါ စစ်ကောင်စီယာဉ်တန်းသည် ယနေ့နံနက် ၁၁ နာရီဝန်းကျင်တွင် ရေရှင်ရွာ လမ်းခွဲသို့ ကျော်လာပြီဖြစ်သည်ဟု မင်းတပ်ဒေသ စစ်ရေးသတင်းများကို ရေးသား ဖော်ပြလေ့ရှိသူ တစ်ဦးက ၎င်း၏ Facebookတွင် ရေးသားထားသည်။
“ရေရှင်နဲ့ မင်းတပ်နဲ့က တော်တော်နီးနေပြီ။ မကြာခင်မှာ မင်းတပ်မြို့ထဲ ဝင်တော့မယ်”ဟု မင်းတပ် CDF ပြောရေးဆိုခွင့်ရှိသူ ဆလိုင်းဟာအွမ်က ပြောသည်။
အဆိုပါ စစ်ကောင်စီယာဉ်တန်းသည် မတူပီမြို့နယ်သို့ ရိက္ခာနှင့် စစ်လက်နက် များပစ္စည်းများ ပို့ဆောင်ခြင်း ဖြစ်သည်ဟု ၎င်းက ဆိုသည်။
မင်းတပ် CDF အနေဖြင့် စစ်အာဏာရှင် ဆန့်ကျင်ရေးအတွက် ဖွဲ့စည်း တည်ထောင်ထားခြင်း ဖြစ်၍ အဆိုပါ စစ်ယာဉ်တန်းများကို ကြားဖြတ် တိုက်ခိုက်မှုများ သေချာပေါက်ရှိလာမည်ဟု ဆလိုင်းဟာအွမ်က ပြောသည်။
ယခင်ကလည်း မင်းတပ် – မတူပီ လမ်းတွင် စစ်ကောင်စီယာဉ်တန်းများကို မင်းတပ် CDFက အကြိမ်ကြိမ် တိုက်ခိုက်မှုများ လုပ်ဆောင်ခဲ့ရာ စစ်ကောင်စီတပ်မှ သေဆုံးထိခိုက်မှုများရှိခဲ့သည်။လက်ရှိ စစ်ရေးအခြေ အနေအရ အဆိုပါလမ်းပိုင်းကို ပြည်သူလူထုများ သွားလာခြင်းမပြုရန် သတိပေးထးသည်ဟု ဆိုသည်။