စစ်အာဏာရှင်ပြုတ်ကျရေး ဆန္ဒထုတ်ဖော်တဲ့ ပြည်သူတွေအပေါ် စစ်ကောင်စီတပ်ဖွဲ့ဝင်တွေရဲ့ အကြမ်းဖက် ဖြိုခွင်းမှုကို ကားပိတ်ရပ်ကာ တားဆီးပေးခဲ့တဲ့ YBS ယာဉ်မောင်း ကိုကျော်ခိုင်ဝင်းကို မနေ့ကမတ်လ ၃၀ ရက်မှာ ထောင်ဒဏ် ၃ နှစ်ချလိုက်ပါတယ်။
ကိုကျော်ခိုင်ဝင်းကို မတည်မငြိမ်ဖြစ်အောင်လှုံဆော်မှု ရာဇသတ်ကြီးပုဒ်မ ၅၀၅ (က) နဲ့ထောင်ချလိုက်တာလို့ နိုင်ငံရေးအကျဉ်းသားများအမှု လိုက်ပါဆောင်ရွက်ပေးနေတဲ့ရှေ့နေအသိုင်းအဝိုင်းတဆင့်သိရပါတယ်။
YBS 24 ယာဉ်မောင်း ကိုကျော်ခိုင်ဝင်းဟာ ပြီးခဲ့တဲ့နှစ် မတ်လ ၂၈ ရက်က သင်္ဃန်းကျွန်းမြို့နယ် အတွင်း ဆန္ဒပြပွဲမှာ ဆန္ဒပြ ပြည်သူတွေကို စစ်ကောင်စီတပ်ဖွဲ့ဝင်တွေ ဖြိုခွင်းချိန် စစ်ကောင်စီတပ်ဖွဲ့ဝင်တွေ ရှေ့ဆက်မတိုးနိုင်အောင် ကားကို ကန့်လန့်ဖြတ်ပိတ်ရပ်ပေးခဲ့တာပါ။
ဒါကြောင့် စစ်ကောင်စီတပ်ဖွဲ့ဝင်တွေရဲ့ ဖမ်းဆီးခြင်းကိုခံလိုက်ရပြီး အင်းစိန်ထောင်မှာ တစ်နှစ်ကျော်ကြာ ချုပ်နှာင်ခံခဲ့ရပါတယ်။
အဲဒီနောက် မနေ့ကတော့ စစ်ကောင်စီက ထောင်ချလိုက်တာလို့သိရပါတယ်။
ကိုကျော်ခိုင်ဝင်းဖမ်းဆီးခံလိုက်ရတာကြောင့် ဇနီးနဲ့ ကလေးနှစ်ဦး စားဝတ်နေရေးခက်ခဲနေတယ်လို့သိရပါတယ်။