နိုင်ငံတကာလေကြောင်းလိုင်းတွေကို ပြန်လည်ပြေးဆွဲခွင့်ပြုတာနဲ့ ပြည်တွင်းကိုဝင်ရောက်လာသူတွေ ကွာရင်းတင်းဝင်ရမယ့် ရက်ကို လျော့ချလိုက်ပေမယ့် ကမ္ဘာ့လှည့်ခရီးသည်တွေအနေနဲ့ မြန်မာနိုင်ငံကိုရှောင်ကြဖို့ တိုက်တွန်းနေကြပါတယ်။
စစ်ကောင်စီဟာ လာမယ့်နှစ်ဆန်းတစ်ရက်နေ့ ( ဧပြီလ ၁၇ ရက် ) နေ့ကစတင်ပြီး နိုင်ငံတကာလေကြောင်းလိုင်းတွေကို ပြန်လည်ပြေးဆွဲခွင့်ပြုမှာပါ။
ဒါအပြင် ဧပြီလ ၁၇ ရက်ကစပြီး ပြည်တွင်းကိုဝင်လာမယ့်သူတွေကိုလည်း ကွာရင်းတင်းတစ်ရက်သာဝင်ရမယ်လို့လျော့ချလိုက်ပါသေးတယ်။
ဒီလိုဖြေလျော့တာတွေလုပ်ပေမယ့် မြန်မာနိုင်ငံကို ခရီးသွားတာရှောင်ကြဖို့ ခရီးသွားအေဂျင်စီတွေ ၊ လူသားချင်းစာနာမှု အကူအညီပေးရေးအဖွဲ့တွေက တိုက်တွန်းထားကြတာပါ။
Public Service Announcement
မြန်မာနိုင်ငံကိုလာရောက်မယ့်ခရီးသွားတွေရဲ့ အမေရိကန်ဒေါ်လာဟာ စစ်ကောင်စီအတွက်သာအကျိုးရှိသွားလိမ့်မယ်လို့ အသိပေးထားကြပါတယ်။
စစ်ကောင်စီရဲ့ လူ့အခွင့်အရေးချိုးဖောက်မှုတွေ ၊ စစ်ကောင်စီရဲ့ အကြမ်းဖက် ပြန်ပေးဆွဲမှုတွေနဲ့ သတ်ဖြတ်မှုတွေ ဖြစ်ပွားနေတာ ၊ စားနပ်ရိက္ခာ မလုံလောက်မှုနဲ့အတူ လျှပ်စစ်မီးပြတ်တောက်မှုတွေ မြန်မာနိုင်ငံမှာဖြစ်ပျက်နေတာကို ကမ္ဘာ့လှည့်ခရီးသွားတွေထံအသိပေးကြပါသေးတယ်။
” မြန်မာနိုင်ငံ ကို ခရီးထွက်ဖို့ ဘယ်သူ့ကိုမှ ကျွန်တော်အကြံပြုမှာမဟုတ်ပါဘူး” လို့ Burma Humanitarian Mission ဥက္ကဋ္ဌ ဖြစ်သလို Backpack Medics ပရဟိတလုပ်ငန်းရဲ့တာဝန်ရှိသူတစ်ဦးဖြစ်တဲ့ မိုက်ကယ် အစ်ရှာဝုဒ်က ပြောပါတယ်။
ခရီးသွားလုပ်ငန်းတွေ မြန်မာမှာပြန်ဖွင့်တာဟာ လူထုကိုဖိနှိပ်နေတဲ့ စစ်ကောင်စီပဲအကျိုးရှိလိမ့်မယ့် လို့လည်း သူကထပ်လောင်းပြောပါသေးတယ်။
အမျိုးသားညီညွှတ်ရေးအစိုးရ ((NUG ) ရဲ့ ဘဏ္ဍာရေးနဲ့ရင်းနှီးမြှပ်နှံမှုဝန်ကြီး ဦးတင်ထွန်းနိုင်ကလည်း ဒီအချိန်ဟာ” မြန်မာပြည်မှာ ရှုခင်းကြည့်ရမယ့်အချိန် ” မရောက်သေးတဲ့အကြောင်း စင်ကာပူအခြေစိုက် The Straits Times သတင်းစာကိုပြောထားပါတယ်။
ဒါအပြင် မြန်မာ ကိုလာရောက်လည်ပတ်တာရှောင်ကြဉ်ကြဖို့လည်း ဝန်ကြီးက တိုက်တွန်းထားပါတယ်။
ကိုးကား−The Guardian
