▪️စစ်ကောင်စီနှစ်ဦးသေ၊အချို့အရှင်ဖမ်းမိ
တရုတ်နိုင်ငံနှင့်နယ်စပ်မြို့ဖြစ်သော ပန်ဝါမြို့အနီးတွင် စစ်ကောင်စီနှင့် ပြည်သူ့စစ်ပူးပေါင်းအဖွဲ့ကို KIAနှင့် PDFပူးပေါင်းအဖွဲ့က တိုက်ခိုက်ခဲ့ရာ စစ်ကောင်စီဘက်က နှစ်ဦးသေဆုံးပြီးအချို့ကို အရှင်ဖမ်းမိခဲ့သည်။
အင်အား ၂၀ကျော်ပါဝင်သည့် စစ်ကောင်စီနှင့် ပြည်သူ့စစ်ပူးပေါင်းအဖွဲ့ကို KIA တပ်ရင်း (၄၆)နှင့် PDFက ယနေ့(ဧပြီ ၁၃ရက်) နေ့လယ်တွင် တိုက်ခိုက်ခဲ့ခြင်းဟု သတင်းရရှိသည်။
“စစ်ကောင်စီနဲ့ ပြည်သူ့စစ်တွေ စီးလာတဲ့ကားကို ဖြတ်တိုက်ပြီး ကားကိုပါ မီးရှို့ပစ်တာ။ စစ်တပ်ဖက်က နှစ်ယောက်သေတယ်။ ဖမ်းမိတာတွေလည်း ရှိတယ်”ဟု ပန်ဝါမြို့မှ သတင်းရင်းမြစ်တစ်ဦးက ပြောသည်။
Public Service Announcement
အရှင်ဖမ်းမိသူ လေးဦးရှိပြီး သေနတ်ဆယ်လက်လည်း သိမ်းဆည်းနိုင်ခဲ့သည်ဟု အထက်ပါသတင်းရင်မြစ်ကဆိုသည်။
တိုက်ပွဲနှင့်ပတ်သက်၍ KIA ပြန်ကြားရေးတာဝန်ခံ ဗိုလ်မှုးကြီးနော်ဘူကို ဆက်သွယ်မေးမြန်းရာအလုပ်မအားလပ်၍ နောက်မှ ပြန်ဆက်သွယ်ရန် ပြောကြားသည်။
ကချင်လွတ်မြောက်ရေးတပ်မတော် KIAသည် စစ်တပ်က နိုင်ငံတော်အာဏာသိမ်းသည်ကို လက်မခံဘဲ အာဏာရှင်ပြုတ်ကျအောင် တိုက်ခိုက်သွားမည်ဟု လူထုအား အသိပေးကြေငြာထားသည်။ KIAသည် အမျိုးသားညီညွတ်ရေးအစိုးရ၊ ပြည်သူ့ကာကွယ်ရေးအဖွဲ့များနှင့်အတူလက်တွဲကာ စစ်အာဏာရှင်ကို တိုက်ခိုက်နေသည်။
