ရန်ကုန်မြို့ လှိုင်သာယာမြို့နယ်အတွင်း အများပြည်သူ စိတ်အနှောက်အယှက် ဖြစ်အောင် မူးရူးရေကစားနေသည့် မဏ္ဍပ်ကို ဖောက်ခွဲတိုက်ခိုက်ခဲ့ကြောင်း Y.G.N PDF က ထုတ်ပြန်သည်။
ဧပြီ ၁၄ ရက် နေ့လယ် ၂ နာရီခွဲအချိန်ခန့်တွင် လှိုင်သာယာမြို့နယ် (၁၀) ရပ်ကွက်ရုံး အနီး၌ စစ်ကောင်စီထောက်တိုင် အုပ်ချုပ်ရေးမှူးနှင့် ဒလန်များစုဝေး၍ မူးရူးကခုန်နေသည်ဟု တိုင်ကြားခဲ့သောကြောင့် ဖောက်ခွဲတိုက်ခိုက်ခဲ့ခြင်းဖြစ်သည်ဟု ထုတ်ပြန်ချက်၌ ဖော်ပြထားသည်။
ယင်းတိုက်ခိုက်မှုကို Y.G.N PDF နှင့်အတူ မြို့ပြပြောက်ကျားမဟာမိတ်အဖွဲ့များ ဖြစ်သည့် Burma Dragon Army ၊ SRF နှင့် Free Tiger Ranger တို့ ပူးပေါင်းတိုက်ခိုက်ခဲ့ခြင်း ဖြစ်သည်။
ယင်းတိုက်ခိုက်မှုကြောင့် အမျိုးသားတစ်ဦးသေဆုံးပြီး အမျိုးသမီးတစ်ဦး ထိခိုက်ဒဏ်ရာရ ရှိသည်ဟု လှိုင်သာယာမြို့ခံတစ်ဦးက ပြောဆိုသော်လည်း မည်သူ၊မည်ဝါဖြစ်သည်ကို သီးခြားအတည်မပြုနိုင်ပေ။
Public Service Announcement
ထို့ကြောင့် ပြည်သူများအနေဖြင့် စစ်ကောင်စီကျင်းပသည့် သင်္ကြန်ကိုပါဝင်ခြင်း မပြုရန်နှင့် စစ်ကောင်စီထောက်တိုင်များ၏ အနီးအနားကို မသွားရန်ထပ်မံ မေတ္တာရပ်ခံထားသည်။
အထက်ပါကဲ့သို့ အကြိမ်ကြိမ်သတိပေးထားသော်လည်း ပြည်သူများအနေဖြင့် လိုက်နာခြင်း မရှိသောကြောင့် တစ်စုံတစ်ရာထိခိုက်မှုရှိပါက မြို့ပြပြောက်ကျား မဟာမိတ်အဖွဲ့များအနေဖြင့် တာဝန်ယူဖြေရှင်းပေးမည်မဟုတ်ကြောင်း ထုတ်ပြန်ထားသည်။
