အသက်ကို ပဓာနမထားဘဲ တိုက်ပွဲဝင်နေသည့် ပြည်သူ့ကာကွယ်ရေးတပ်ဖွဲ့ဝင်များအား ဦးညွတ်လေးစားလျက် ထောက်ပံ့ရေးများကို အောင်ပွဲရပြီးသည်အထိ လုပ် ဆောင်နေမည်ဟု တောင်ကိုးရီးယားရောက် မြန်မာနိုင်ငံသားများက ထုတ်ပြန်ကြေညာသည်။
တောင်ကိုရီးယားနိုင်ငံရှိ မြန်မာနိုင်ငံသားများနှင့် အား ပေးသူ ကိုရီးယားနိုင်ငံသားများသည် အာဏာရှင်စနစ် အမြစ်ဖြတ်ရေး ပြည်သူ့တော်လှန်ရေးတွင် တသွေးတသားတည်းတည်ရှိပြီး အမျိုးသားညီညွတ်ရေးအစိုးရ (NUG) ၏ နိုင်ငံရေးဦးဆောင်မှုအောက်တွင် တညီ တညွတ်တည်း လိုက်ပါနေကြောင်း ထုတ်ပြန်ချက်၌ ဖော်ပြသည်။
ထို့အပြင် ၎င်းတို့သည် ဖက်ဒရယ်ဒီမိုကရေစီနိုင်ငံတော်သစ် ထူထောင်တည်တံ့သည့်တိုင်အောင် အားသွန် ကြိုးပမ်းကြမည်ဟုလည်း ကတိပြုသည်။
တောင်ကိုရီးယားရောက်မြန်မာများနှင့် စုဖွဲ့ထားသော စစ်အာဏာသိမ်းမှုဆန့်ကျင်ရေးကော်မတီသည် ပြီးခဲ့သည့် (၆)လအတွင်း NUG ကို ဒေါ်လာ ၆သိန်း၊ မြေပြင် LPDF အဖွဲ့ ၄၉ ဖွဲ့ကို ကျပ်သိန်း ၉၈၀ကို တိုက်ရိုက် ထောက်ပံ့ခဲ့၍စုစုပေါင်း ဝမ်သိန်းပေါင်း ၉ ထောင်ကျော်အထိ ပေးပို့ ထောက်ပံ့နိုင်ခဲ့ကြောင်း ဧပြီ ၃ ရက်တွင် ထုတ်ပြန်ထားသည်။
Public Service Announcement
မြန်မာနိုင်ငံတွင် ဒီမိုကရေစီစနစ် ပြည်လည်ရှင်သန်ရေး အားပေးထောက်ခံနေသော ကိုရီးယားပြည်သူ ပြည်သားများကို ကျေးဇူးတင်ကြောင်းနှင့် ကိုရီးယားအစိုးရထံမှ ပိုမိုထိရောက်သော အကူအညီများကို မျှော်လင့်ကြောင်း ထုတ်ပြန်ချက်၌ အသိပေးထားသည်။
ယင်းနောက် အာဆီယံနှင့် ကုလသမဂ္ဂတို့ တိုက်တွန်းနေသော စေ့စပ်ညှိနှိုင်းရေး လမ်းစဉ်သည် မြန်မာနိုင်ငံ၏ ပကတိ အခြေအနေနှင့်မကိုက်ညီဘဲ စစ်ကောင်စီအတွက် အချိန်ဆွဲပေးရာ ရောက်နေကြောင်းလည်း ဖော်ပြသည်။
စစ်ရာဇဝတ်မှု၊ လူမျိုးတုံးသတ်ဖြတ်မှု၊ နိုင်ငံတော် သစ္စာဖောက်မှုတို့ကို ပြောင်ပြောင်တင်းတင်း ကျူးလွန်နေသည့် မင်းအောင်လှိုင်နှင့် အကြမ်းဖက်စစ်တပ်ကို နိုင်ငံတကာတရားရုံး (ICJ)၊ နိုင်ငံတကာရာဇဝတ်ရုံး (ICC)တို့က ထိရောက်စွာအရေးယူ အပြစ်ပေးနိုင်ရန် တောင်းဆိုထားသည်။
အကြမ်းဖက်စစ်ကောင်စီနှင့် ပူးပေါင်းကာ ကိုယ်ကျိုးရှာဖွေနေသော ပြည်တွင်းပြည်ပ လူပုဂ္ဂိုလ်နှင့် ကုမ္ပဏီ အဖွဲ့အစည်းများ၊ လက်နက်ရောင်းပေးနေသော နိုင်ငံအစိုးရများအား ကျင့်ဝတ်ပျက်ပြားသူများအဖြစ် သတ်မှတ်ကာ ကန့်ကွက်ရှုတ်ချကြောင်းလည်း ထုတ်ပြန်ထားသည်။
