▪️ဖက်ဒရယ်ဒီမိုကရေစီ ပြည်ထောင်စုတည်ဆောက်ရာ၌ပါဝင်လာရန် လိုလားကြောင်းဖော်ပြ
အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက ယနေ့ကျရောက်သည့် “ဝ”ပြည်နယ် ငြိမ်းချမ်းရေးတည်ဆောက်မှု (၃၃)နှစ်ပြည့်သို့ သဝဏ်လွှာပေးပို့ခဲ့သည်။
“ဝ” ပြည်နယ်၏ရရှိပြီးသော ငြိမ်းချမ်းစွာအတူယှဉ်တွဲနေထိုင်မှုနှင့်လူမှုစီးပွားကဏ္ဍပေါင်းစုံ တိုးတက် ဖွံ့ဖြိုးမှုများ အဓွန့်ရှည်တည်တံ့ခိုင်မာစေရန် “ဝ”အမျိုးသားခေါင်းဆောင်များနှင့်“ဝ”ပြည်သူများ ဆထက်ထမ်းပိုးကြိုးပမ်းဆောင်ရွက်နိုင်ပါစေကြောင်းနှင့်အနာဂတ်ဖက်ဒရယ်ဒီမိုကရေစီ ပြည်ထောင်စုသစ်ကို အုတ်မြစ်ချထူထောင်ရာတွင် အမြော်အမြင်ကြီးမားစွာဖြင့် ဦးဆောင်ပါဝင်နိုင်ပါစေကြောင်း ဆုမွန်ကောင်း တောင်းအပ်သည်ဟု သဝဏ်လွှာ၌ ဖော်ပြထားသည်။
၀ပြည်သွေးစည်းညီညွတ်ရေးပါတီ/၀ပြည်သွေးစည်း ညီညွတ်ရေးတပ်မတော်(UWSP/UWSA) သည် ဗမာပြည်ကွန်မြူနစ်ပါတီက ခွဲထွက်လာသည့် လက်နက်ကိုင်တပ်ဖြစ်ပြီး ၁၉၈၉ ဧပြီ ၁၇ရက်တွင် ဖွဲ့စည်းတည်ထောင်ခဲ့သည်။
မြန်မာ-တရုတ်နယ်စပ်အခြေစိုက် UWSAသည် စစ်အစိုးရနှင့် ငြိမ်းချမ်းရေးရယူခဲ့သည့် နှစ် ၃၀ကျော်အတွင်း စစ်တပ်နှင့် တိုက်ပွဲဖြစ့်ပွားမှု မရှိသလောက်နည်းပါးခဲ့သည်။ စစ်တပ်အာဏာသိမ်းပြီးနောက်ပိုင်းတွင်လည်း အာဏာသိမ်းမှု အပေါ် နုတ်ဆိတ်နေသည့် လက်နက်ကိုင်အဖွဲ့တစ်ခု ဖြစ်သည်။