စစ်ကောင်စီ၏ စစ်ရေးဗျူဟာအပေါ် မူတည်ပြီး ချင်းပြည်နယ်နှင့် ဆက်စပ်ဒေသများ၌ တိုက်ပွဲအရှိန်မြှင့်ပြီး စစ်ရေးအရ ပိုမိုစိုးမိုးနိုင်ရေး ဆောင်ရွက်ရန် ချင်းပြည်ပူးတွဲကာကွယ်ရေးကော်မတီ(CJDC)၌ ဆွေးနွေးထားသည့်ဟု CDJC အဖွဲ့ဝင် ချင်းအမျိုးသားတပ်ဦး(CNF/CNA) ပြောရေးဆိုခွင့်ရှိသူ ဆလိုင်းထက်နီက ပြောကြားသည်။
CNFနှင့် ဒေသအသီးသီးရှိ ချင်းဒေသကာကွယ်ရေးတပ်(CDF)များအပါအဝင် ချင်းလက်နက်ကိုင်တပ် ၁၈ ဖွဲ့ဖြင့် စုဖွဲ့ထားသည့် CJDC အစည်းအဝေးကို ဧပြီ ဒုတိယပတ်က ကျင်းပခဲ့ခြင်းဖြစ်သည်။ ယင်းအစည်း အဝေး၌ မြို့နယ်နှင့် ဒေသကာကွယ်ရေးတပ်များ၏ စစ်ရေးဆိုင်ရာ အစီရင်ခံချက်များကို ပြန်လည်သုံးသပ်ခြင်း၊ ရှေ့လုပ်ငန်းစဉ်များချမှတ်ခြင်း လုပ်ဆောင်ခဲ့သည်ဟု CJDCက ထုတ်ပြန်ထားသည်။
“ကျွန်တော်တို့က CJDC စုဖွဲ့မှုကို ပိုမိုကျစ်လစ်ခိုင်မာအောင်လုပ်ပြီးတော့ စစ်ရေးမှာ ပိုမိုပြီး ပူးတွဲဆောင်ရွက်ဖို့ နည်းဗျူဟာချတာပေါ့နော်။စစ်ကောင်စီရဲ့ ဗျူဟာအပေါ် သုံးသပ်ပြီး ကျွန်တော်တို့က ပိုမိုပြီးတော့ တိုက်ပွဲဝင်ဖို့ အရှိန်မြှင့်ဖို့ ဆွေးနွေးထားတာဖြစ်ပါတယ်”ဟု ဆလိုင်းထက်နီက ပြောသည်။
CNA နှင့် CDFများ တည်ရှိရာဒေသအပါအဝင် ချင်းပြည်နယ်နှင့် ဆက်စပ်ဒေသများ၌ စစ်ရေးအရ ပိုမိုပြီး စိုးမိုးနိုင်ရန် အားထည့်ဆောင်ရွက်သွားမည်ဖြစ်ပြီး ယင်းသို့ လုပ်ဆောင်နိုင်မည်ဟုလည်း ယုံကြည် ကြောင်း ၎င်းက ဆိုသည်။
Public Service Announcement
ထို့ကြောင့် ပြည်သူများအနေဖြင့် တော်လှန်ရေးတွင် ဝိုင်းဝန်းပံ့ပိုးပြီး ဆက်လက်တောင့်ခံကြရန် ဆလိုင်းထက်နီက တိုက်တွန်းသည်။
လက်တလောတွင် ချင်းပြည်နယ် အတွင်းဒေသများ၌ စစ်ကောင်စီတပ်၏ စစ်ရေးလှုပ်ရှားမှုများ အနည်းငယ် ငြိမ်နေပြီး ချင်းပြည်နယ်တောင်ပိုင်း မတူပီမြို့နယ်တွင် စစ်ရေးလှုပ်ရှားမှု အချို့ရှိနေသည်ဟု ဆိုသည်။
