ဘားအံမြို့နယ်အတွင်းက ဝါးဘိုးတောရဲကင်းစခန်းဂိတ် ပစ်ခတ်တိုက်ခိုက်မှုမှာ စစ်ကောင်စီရဲတပ်ဖွဲ့ဝင် ခြောက်ဦးသေဆုံးသွားခဲ့ပြီး လက်နက်တွေကိုလည်း သိမ်းဆည်းရမိခဲ့တယ်လို့ ဒေသခံတွေက ပြောပါတယ်။
ဒီကနေ့ မနက် ၈ နာရီဝန်းကျင်အချိန်က ဘားအံ-သထုံကားလမ်းနဲ့ ဘားအံ-ဖာပွန်ကားလမ်း ဝါးဘိုးတောလမ်းဆုံမှာရှိတဲ့ စစ်ကောင်စီရဲကင်းဂိတ်ကို KNLA ပူးပေါင်းအဖွဲ့က လာရောက်ပစ်ခတ်တိုက်ခိုက်ခဲ့ပြီး ရဲခြောက်ဦး သေဆုံးသွားခဲ့တာပါ။
ဒါ့အပြင် ရဲတပ်ဖွဲ့ဝင်တွေကိုင်ဆောင်တဲ့ လက်နက်နဲ့ ကျည်ဆံတွေကိုလည်း သိမ်းဆည်းရမိခဲ့တယ်လို့ KNLA တပ်မဟာ ၁ ထံကနေ သိရပါတယ်။
ဝါးဘိုးတောရဲကင်းဂိတ်ဟာ သွားလာနေသူတွေအပေါ် စစ်ဆေးတာတွေ ခဏခဏလုပ်ဆောင်နေပြီး သွားလာတဲ့သူတွေအပေါ် စစ်ဆေးမေးမြန်းထူတဲ့အတွက် လုပ်ဆောင်တာဖြစ်မှာပေါ့လို့ တပ်မဟာ ၁ တာဝန်ရှိသူတစ်ဦးက ကေအိုင်စီသတင်းဌာနမှာ ဖြေကြားထားတာပါ။
Public Service Announcement
ဒီလို ရဲကင်းဂိတ်စခန်းကို လာရောက်ပစ်ခတ်တိုက်ခိုက်ခဲ့ပြီးတဲ့နောက် ဂိတ်အနီးမှာ ဗုံးနှစ်လုံးထပ်မံပေါက်ကွဲခဲ့သေးတယ်လို့ ဒေသခံတွေဆီကနေ သိရပါတယ်။
ဝါးဘိုတောရဲကင်းဂိတ်စခန်းဟာ ကေအဲန်ယူ-ဒူးသထူခရိုင် ဘားအံမြို့နယ် တပ်မဟာ ၁ နယ်မြေအတွင်းမှာတည်ရှိတဲ့ ဂိတ်စခန်းတစ်ခုလည်း ဖြစ်ပါတယ်။
