ထားဝယ်-ထီးခီးလမ်းပေါ်ရှိ ပကာရီရဲစခန်းကို PDFပူးပေါင်းတပ်က ယနေ့(ဧပြီ ၂၄) နေလယ်ပိုင်းက ဝင်ရောက် စီးနင်းတိုက်ခိုက်မီးရှို့ ဖျက်သိမ်းလိုက်ပြီးဖြစ်ကြောင်း တနင်္သာရီစစ်ဒေသခွဲ ကွပ်ကဲရေးအဖွဲ့က ယနေ့ ထုတ်ပြန်လိုက်သည်။
ထိုကြောင့် ထားဝယ်-ထီးခီးလမ်းပိုင်း အရပ်သားကားများ အသုံးပြုမှု ခတ္တ ရပ်ဆိုင်းထားပေးရန် မြေပြင် PDF ရဲဘော်များက မေတ္တာရပ်ခံလိုက်သည်ဟု တနင်္သာရီစစ်ဒေသခွဲ ကွပ်ကဲရေးအဖွဲ့၏ထုတ်ပြန်ချက်တွင်ပါဝင်သည်။
“ရဲစခန်းက ပြာကျသွားပြီ။ စစ်ကောင်စီတပ်က စစ်ကူလွှတ်လိုက်တယ်၊ အဲ့တာတွေကို ထပ်ဆော်ဖို့ အရပ်သားကားတွေ မလာဖို့တားထားကြတာ”ဟု ဒေသခံတစ်ဦးကပြောသည်။
လက်ရှိတွင် စစ်ကောင်စီတပ်သားများက အထက်ပါ စခန်းအနီးသို့ အလုံးအရင်းဖြင့် လာရောက်နေကြသည်ဟုလည်းသိ့ရသည်။
ထိုလမ်းပိုင်းတွင် တိုက်ပွဲများ အချိန်မရွေးဖြစ်ပေါ်လာနိုင်ပါသဖြင့် အရပ်သားများ မထိခိုက်စေရန်အတွက် အရပ်သားကား သွားလာခြင်းမပြုရန် မြေပြင် ပြည်သူ့ကာကွယ်ရေးတပ်မတော်၊ တပ်ဖွဲ့များက မေတ္တာရပ်ခံထားရခြင်းဖြစ်သည်ဟုလည်းဆိုသည်။