အမျိုးသားညီညွတ်ရေးအစိုးရ (NUG)သည် ပဲခူးတိုင်းအား အုပ်ချုပ်မှုနယ်မြေတိုးချဲ့ရန် ပြင်ဆင်နေပြီး ယင်းအတွက် နိုင်ငံတကာရောက် မြန်မာမိသားစုများက အလှူငွေကျပ်သိန်း ၆,၀၀၀ နီးပါး(အမေရိကန်ဒေါ်လာ ၃၀၀,၀၀၀) ယမန်နေ့တွင် ထည့်ဝင်ကူညီသည်။
Myanmar American Forum က တာဝန်ယူပြုလုပ်သည့် Global Myanmar Forumကို ယမန်နေ့တွင် ကျင်းပခဲ့ရာ Operation Bago အတွက် နာရီပိုင်းအ တွင်း ကျပ်သိန်း ၆,၀၀၀ နီးပါးရရှိခဲ့ခြင်း ဖြစ်သည်။
“ပဲခူးတိုင်းနဲ့ပတ်သက်လို့ ကျွန်တော်တို့ သေချာပြင်ဆင်နေပြီ။ ဒီနေ့အထိ ပဲခူးနဲ့ပတ်သက်လို့ လှူတာတွေတွေ့ရတာ အရမ်းဝမ်းသာတယ်။ ဂုဏ်လည်းဂုဏ်ယူတယ်။ ကျွန်တော်တို့ တော်လှန်ရေး အတွက် အားတက်တယ်” ဟု အထက်ပါဖိုရမ်တွင် NUG ပြည်ထဲရေးနှင့် လူဝင်မှု ကြီးကြပ်ရေးဝန်ကြီး ဦးလွင်ကိုလတ်က ပြောသည်။
အဆိုပါ ထည့်ဝင်လှူဒါန်းမှုတွင် ထိုင်းရောက်မြန်မာလုပ်သားများထည့်ဝင်လှူဒါန်းမှုဖြင့် AAC မဟာမိတ်၏ ကိုရဲမင်းဦးဆောင်သောအဖွဲ့က ကျပ်သိန်းတစ်ထောင် လှူဒါန်းခဲ့သည်။
Public Service Announcement
Myanmar American Forum ကလည်း “Operation Bago အတွက် အလှုခံရာမှာ အစည်းအဝေးကျင်းပတဲ့ ၂ နာရီကျော်အတွင်း အမေရိကန်ဒေါ်လာ ၃ သိန်းကျော် ၊ မြန်မာကျပ်ငွေသိန်းခြောက်ထောင်နီးပါးရရှိပါတယ်။ တစ်ကမ္ဘာလုံးကမြန်မာပြည်ဖွားတွေ ဒီလောက်ညီနေရင် မကြာခင် မြန်မာပြည်ဟာစစ်ခွေးကင်းမဲ့ဇုန် ဖြစ်တော့မှာပါ”ဟု ထုတ်ပြန်သည်။
အမေရိကန်ပြည်ထောင်စုမှ Operations Bago အတွက် ထည့်ဝင်လိုသူများသည် operationpago@gmail.com HUMANITARIAN AND DEVELOPMENT FOUNDATION
(Zelle Account)သို့ တိုက်ရိုက်လှုဒါန်းနိုင်ကြောင်း Myanmar American Forum က ထုတ်ပြန်သည်။
NUG သည် စစ်ကိုင်းတိုင်းနှင့် မကွေးတိုင်းတို့၌ အုပ်ချုပ်မှုနယ်မြေများ စတင်တည်ဆောက်ခဲ့ပြီး လက်ရှိတွင် ယင်းတိုင်းနှစ်ခုရှိ မြို့နယ်ပေါင်း ၃၆ ၌ မြို့ပေါ်များမှလွဲ၍ ကျေးရွာစုစုပေါင်း၏ ၈၀ ရာခိုင်နှုန်းခန့်ကို ကောင်းမွန်စွာထိန်းချုပ်ထားနိုင်ကြောင်း ပြည်ထဲရေးဝန်ကြီး ဦးလွင်ကိုလတ်က ပြောသည်။
