စစ်ကိုင်းတိုင်း၊ မင်းကင်းမြို့နယ် ချင်းတွင်းမြစ်အတွင်း အကြမ်းဖက်စစ်တပ်မော်တော်များ တိုက်ခိုက်ခံရပြီးနောက် အကြမ်းဖက်စစ်တပ်က မြစ်ဘေးကျေးရွာသုံးရွာကို တက်မီးရှို့ရာ နေအိမ်ပေါင်း ၂၀၀ကျော် မီးလောင်ပျက်စီးသွားကြောင်း ဒေသခံများက ပြောသည်။
ယမန်နေ့ (မေလ ၂၁ ရက်)က မင်းကင်းတပ်ရင်း (၃) ၏တိုက်ခိုက်မှုကြောင့် ထိခိုက်မှုများရှိပြီးမော်တော်တစ်စီးပါ၀မ်းပေါက်သွားခဲ့သည်။
နှင်းကြီးဆိပ်ကမ်းတွင် ဆိုက်ကပ်ထားကြသော မော်တော်အုပ်စုသည် ကမ်းပေါ်တက်လာခဲ့ကြပြီး နှင်းကြီးကျေးရွာ၊လက်ချိတ်ကျေးရွာနှင့် ဖက်ခက်ရွာတို့အား မီးရှို့ဖျက်ဆီးခဲ့ခြင်းဖြစ်ကြောင်း ဒေသခံများက ပြော သည်။
သုံးရွာစုစုပေါင်း အိမ်ခြေ ၂၀၀ခန့်မီးရှို့ဖျက်ဆီးသွားကြောင်း ဒေသခံများက ပြောသည်။
ရွာသူ၊ရွာသားများဘေးလွတ်ရာ တိမ်းရှောင်နေကြရပြီး ယနေ့အထိ ရွာပြန်မကပ်နိုင်သေးရဲသေး၍ ဆုံးရှုံးမှုအသေးစိတ်မသိရသေးကြောင်း ဒေသခံများက ပြောသည်။
မင်းကင်းမြို့နယ်၊ မြစ်ရိုးအောက်ဒေသတွင် အကြမ်းဖက်စစ်တပ်နှင့် ပျူစောထီးများမီးရှို့ဖျက်ဆီးမှုကြောင့် ဘင်၊ အနောက်တော၊ သံပေါက်၊ လောင်းပြည့်၊ ဇင်ကလဲ၊ နှင်းကြီး၊ လက်ချိတ်၊ ဖက်ခက် ၊ တောင်လက်ဒေသမှ ပွင့်လျက်၊ အနောက်ကူလဲ စုစုပေါင်း ၁၀ရွာအထိရှိလာပြီဖြစ်ကြောင်း ဒေသခံများက ပြောသည်။
စစ်ကိုင်းတိုင်းသည် အကြမ်းဖက်စစ်တပ်၏ မီးရှို့ဖျက်ဆီးမှုအများဆုံးခံရသောတိုင်းတစ်ခုဖြစ်ပြီး ၂၀၂၁ ဖေဖော်ဝါရီ ၁ ရက်မှ ၂၀၂၂ ဧပြီကုန်အထိ Data For Myanmar ပြုစုထားသောစာရင်းအရ နိုင်ငံတစ်ဝန်းနေအိမ်ပေါင်း ၁၁,၄၀၀ ကျော်မီးရှို့ဖျက်ဆီးခံခဲ့ရ ရာတွင် စစ်ကိုင်းတိုင်းမှာ ၇,၅၀၀ ကျော်ရှိခဲ့သည်။
သို့သော်အကြမ်းဖက်စစ်တပ်က စစ်ကိုင်းတိုင်းတွင်မေလတွင် ပိုမိုဆိုးရွာစွာ အကြမ်းဖက်မီးရှို့ဖျက်ဆီးနေ၍ မေလအတွင်း မီးရှို့ဖျက်ဆီးခံရသောစာရင်းမှာ နေအိမ်ထောင်ပေါင်းများစွာ တိုးလာမည်ဖြစ်သည်။