ရန်ကုန်မြို့တွင် စက်သုံးဆီဝယ်ယူရန် ခက်ခဲလာခြင်းကြောင့် မှောင်ခိုဈေးကွက်ပြန်လည်ပေါ်ပေါက်လာကြောင်း ဈေးကွက်အတွင်းမှ စုံစမ်းသိရှိရသည်။
စစ်ဗိုလ်ချုပ်များမှ အသွင်ပြောင်းခဲ့သည့် ဦးသိန်းစိန်အစိုးရလက်ထက်မှ စတင်ပြီးဈေးကွက်အတွင်းပျောက်ကွယ်သွားသည့် မှောင်ခိုစက်သုံးဆီဈေးကွက်တွင် စစ်တပ်အာဏာသိမ်းပြီး တစ်နှစ်ကျော်ကာလအတွင်း ပြန်လည်ပေါ်ပေါက်လာခြင်းဖြစ်သည်ဟု ယာဉ်မောင်းများကပြောသည်။
“ဆီဆိုင်တွေမှာ ဆီဝယ်ဖို့ခက်တော့ တချို့နေရာတွေမှာ ဈေးပိုပေးရပေမယ့် ဆီမှောင်ခိုဈေးကွက်ပြန်ပေါ်လာပြီ”ဟု အငှားယာဉ်မောင်းတစ်ဦးက ပြောသည်။
မှောင်ခိုဆီဆိုင်များကို လုံခြုံရေးအရ ထုတ်ပြောရန် မဖြစ်နိုင်သော်လည်း ရန်ကုန်မြို့တွင် မှောင်ခိုဈေးကွက်တွင် ကားသမားများ အလွယ်တကူဝယ်ယူနိုင်သည်ဟု ၎င်းက ဆိုသည်။
လက်ရှိ ရန်ကုန်မြို့တွင် အောက်တိန်း ၉၂ နှင့်အောက်တိန်း ၉၅ ဝယ်ယူရန် အလွန်ခက်ခဲလာပြီး ဆိုင်အများစုမှာလည်း ဆီပြတ်တောက်မှုများရှိနေသည်ဟု ယာဉ်မောင်းများက ပြောသည်။
Public Service Announcement
“Denkoတို့ လိုဆီဆိုင်အကြီးတွေမှာပဲ ဆီက ဝယ်ရတော့တယ်။ အခြားဆီဆိုင်သေးသေးတွေဆို ဆိုင်တောင်ပိတ်ကုန်ပြီ”ဟု ယနေ့ စက်သုံးဆီဝယ်ခဲ့သူတစ်ဦးက ပြောသည်။
စစ်ကောင်စီထိန်းချုပ်ထားသည့် စက်သုံးဆီတင်သွင်းရောင်းချဖြန့်ဖြူးရေးအသင်းက မေလ ၂၁ ရက်မှ စတင်ပြီး စက်သုံးဆီဆိုင် ၃၂၄ ဆိုင်ကို ဆီခွဲတမ်းဖြင့်ထုတ်ပေးမည်ဖြစ်ကြောင်းထုတ်ပြန်ခဲ့သည်။ ထိုကြေညာချက်ကြောင့် ဈေးကွက်အတွင်း စက်သုံးဆီအရောင်းဆိုင်ငယ်များ အရောင်းရပ်ဆိုင်းသွားခြင်းဖြစ်သည်။
ယနေ့ စက်သုံးဆီဆိုင်များတွင် အောက်တိန်း ၉၂ တစ်လီတာကို ၂၂၂၀ကျပ်နှင့် အောက်တိန်း ၉၅ တစ်လီတာကို ၂၃၀၀ အထက်ဈေးဖွင့်ထားသော်လည်း ရောင်းချရန် ဆီပြတ်လပ်နေသည်ဟု ဆိုင်ဝန်ထမ်းများက ပြောသည်။
