ဖမ်းဆီးခံရသော ဆရာသုံးဦး၏သိက္ခာကျအောင် ပုံဖော်သတင်းမှားဖြန့်ခြင်းမှာ စစ်ကောင်စီ၏လုပ်ရိုးလုပ်စဥ်ဖြစ်
ဖမ်းဆီးခံရသော ဆရာသုံးဦး၏သိက္ခာကျအောင် ပုံဖော်သတင်းမှားဖြန့်ခြင်းမှာ စစ်ကောင်စီ၏လုပ်ရိုးလုပ်စဥ်ဖြစ်Kaung For You ပညာရေးကျောင်း အချက်အလက်ပေါက်ကြားမှုနှင့်ပတ်သက်ပြီး သက်ဆိုင်ရာဝန်ကြီးဌာနများနှင့်ချိတ်ဆက်၍ တတ်နိုင်သည့်ဘက်မှ ကူညီပေးသွားမည်ဟု အမျိုးသားညီညွတ်ရေး အစိုးရ(NUG)၊ ပညာရေးဝန်ကြီးဌာနက ယနေ့(ဇူလိုင် ၁၇) အသိပေးထုတ်ပြန်သည်။
အချက်အလက်ပေါက်ကြားမှုကြောင့် ဖြစ်ပေါ်လာသည့် ကျောင်းအပ်နှံထားသော ကျောင်းသား၊ ကျောင်းသူများ၏ ပညာရေး၊ အဖမ်းခံရသောဆရာ၊ ဆရာမများနှင့်ပတ် သက်၍ တတ်နိုင်သည့်ဘက်မှ ကူညီဆောင်ရွက်ပေးမည်ဟု ဖော်ပြသည်။
ခြိမ်းခြောက်ငွေညှစ် တောင်းခံခြင်းခံခဲ့ရသော ပြည်သူ များအနေဖြင့် တိုင်ကြားနိုင်ရန်နှင့် အရေးယူဆောင်ရွက်နိုင်ရန် (Complaint Mechanism) hotline channel များကိုလည်း ပြန်လည်အသိပေးသွားမည်ဟု ဆိုသည်။
“ဆရာ၊ ဆရာမများ၊ မိဘများနှင့် ကလေးများအတွက် စိတ်ပိုင်းဆိုင်ရာ နှစ်သိမ့်ဆွေးနွေးမှု အစီအစဉ်များ ကိုလည်း (Counseling Service) လုပ်ဆောင်ပေးသွားမည်ဖြစ်သည်”ဟု အသိပေးသည်။
Public Service Announcement
ပညာရေးဝန်ကြီးဌာနအနေဖြင့် ကျောင်းသား၊ ကျောင်း သူများ၊ မိဘများနှင့် ဆရာ၊ ဆရာမများ၏ လုံခြုံရေးတို့ကို ဦးစားပေး၍ ဇွန်လ ၂၂) ရက်နေ့တွင် အချက်အလက်ပေါက်ကြားမှုနှင့်စပ်လျဥ်းပြီး Kaung for You ကျောင်းမှ တာဝန်ရှိသူများအား စတင်ခေါ်ယူကာ ဆွေးနွေးမေးမြန်းခဲ့ကြောင်း ဖော်ပြသည်။
ဖြစ်စဥ်မှာဆွေးနွေးရုံဖြင့် မလုံလောက်ဘဲ စစ်ဆေးရမည်ဟုယူဆသောကြောင့် ဝန်ကြီးဌာနအတွင်း “စုံစမ်းစစ် ဆေးရေးနှင့် အကြံပေးရေး ကော်မတီ”တစ်ရပ်ဖွဲ့စည်းကာ စုံစမ်းမှုများစတင်ပြုလုပ်၍ စစ်ဆေးရန် ပြင်ဆင်ခဲ့ရာ ဇူလိုင် ၁၃ရက် နံနက်တွင် Kaung For You ကျောင်းတည်ထောင်သူ ဆရာဦးကောင်းသိုက်စိုး အဖမ်းခံရသည်ဟူသော သတင်းများထွက်ပေါ်လာခဲ့ခြင်းဖြစ်သည်ဟု ဆို သည်။
ထိုသတင်း ထွက်ပေါ်ခဲ့ပြီးနောက်တွင် အကြမ်းဖက်စစ်အုပ်စုမှ သတင်းများအား နောက်ယောင်ခံ၍ ဆရာ၊ ဆရာမများနှင့် ကျောင်းသား၊ ကျောင်းသူများအား ဖမ်းဆီးမှုများ ကျူးလွန်ခဲ့ကြောင်း ဖော်ပြသည်။
ထို့အပြင် ဇူလိုင် ၁၆ ရက် ညတွင်မူ စစ်ကောင်စီသတင်းဌာနမှ ဆရာဦးကောင်းသိုက်စိုး အပါအဝင် CDM ဆရာသုံးဦးကို မတရားဖမ်းဆီးသည့်အပြင် ဆရာ့ပုံရိပ်သိက္ခာများ ကျဆင်းစေရန် မဟုတ်မမှန်သတင်းများ လုပ်ကြံဖန်တီး၍ ထုတ်ပြန်ကြေညာခဲ့ရာ ယုံကြည်ဖွယ်ရာမရှိသော လုပ်ကြံဖန်တီးခဲ့သည့် သတင်းမှားများသည် စစ်ကောင်စီ၏လုပ်ရိုးလုပ်စဉ်များသာဖြစ်ကြောင်း ထောက်ပြသည်။
ကျောင်းသား၊ ကျောင်းသူများကို ပညာသင်ကြားပေးနေသော ဆရာ၊ ဆရာမများအား မတရားဖမ်းဆီးခြင်းသည် ပညာသင်ယူခွင့်ဆုံးရှုံးနေသော ကလေးသူငယ်များ စဉ်ဆက်မပြတ် ပညာသင်ယူခွင့်ရရှိစေရန်အတွက် ကြားကာ လပညာရေးဖော်ဆောင်နေသော ကျောင်းများကို ဖျက်ဆီးရန် ရည်ရွယ်ချက်ဖြင့် လုပ်ဆောင်နေခြင်း ဖြစ်သည်ဟု ဆိုသည်။
အကြမ်းဖက်စစ်ကောင်စီ၏ လုပ်ရပ်များသည် ကျောင်း သား၊ ကျောင်းသူများ၏ ပညာရေးအခွင့်အရေးများအား ဖော်ပြထားသော ကမ္ဘာ့လူ့အခွင့်အရေးကြေညာချက်စာ တမ်း အပိုဒ် (၂၆)၊ ကမ္ဘာ့ကလေး သူငယ်အခွင့်အရေးဆိုင် ရာ သဘောတူစာချုပ် အပိုဒ် (၃၊ ၂၈)နှင့် ပြည်တွင်းဥပဒေဖြစ်သည့် ၂၀၁၉ ခုနှစ် ကလေးသူငယ်အခွင့်အရေးများဆိုင်ရာဥပဒေပြဋ္ဌာန်းချက်များအားပြောင်ပြောင် တင်း တင်း ကျူးလွန်နေခြင်းဖြစ်ကြောင်း ထောက်ပြသည်။
Kaung For You ကျောင်း၏ အချက်အလက်ပေါက်ကြားမှုကို အခွင့်ကောင်းယူကာ ဆရာ၊ ဆရာမများ၊ ကျောင်းသားမိဘများ၊ ကျောင်းသားကျောင်းသူများအား ဖမ်းဆီးချုပ်နှောင်ခြင်း၊ ခြိမ်းခြောက်ခြင်း၊ ငွေလိမ်လည်ခြင်းများ ပြုလုပ်နေမှုများအား အမျိုးသားညီညွတ်ရေးအစိုးရ၏ ဝန်ကြီးဌာနများအနေဖြင့် စုံစမ်းဖော်ထုတ်ကာ တရားမျှတမှုရရှိစေရေး ဆောင်ရွက်သွားမည် အသိပေးသည်။
ထို့အပြင် အမျိုးသားညီညွတ်ရေးအစိုးရ ပညာရေး၀န်ကြီးဌာနသည် မိဘပြည်သူများ၊ ဆရာ၊ ဆရာမများနှင့် ကျောင်းသူ၊ ကျောင်းသားများ၏ လုံခြုံရေးကို အစဥ်အမြဲအလေးထားစဥ်းစားပြီး ကြားကာလပညာရေး ဖော်ဆောင်နေသာကျောင်းများတွင် အလားတူဖြစ်ရပ်မျိုး ထပ်မံမဖြစ်ပွားစေရန် လမ်းညွှန်အကြံပြုချက်များ၊ ပံ့ပိုးကူညီမှုများနှင့်အတူ ပညာရေးလုပ်ငန်းများအား ပူးပေါင်း ဆောင်ရွက်သွားမည်ဖြစ်ကြောင်း ထုတ်ပြန်ထားသည်။
