သေဒဏ်ချခံရသူတွေ တရားလက်လွတ်သတ်ဖြတ်ခံရမယ့်အလားအလာရှိနေ

နှစ်ပေါင်း ၃၀ ကျော်အတွင်း နိုင်ငံရေးအမှုနဲ့ ဖမ်းဆီးခံရသူ ၄ ဦးကို ပထမဆုံးအကြိမ်သေဒဏ်စီရင်ပြီးနောက် စစ်ကောင်စီဖမ်းဆီးသေဒဏ်ချခံထားရသူတွေအတွက်စိုးရိမ်စရာဖြစ်လာပါတယ်။

စစ်အာဏာသိမ်းမှုကို ဆန့်ကျင်တဲ့ နွေဦးတော်လှန်ရေးနဲ့ဆက်စပ်လို့ ဖမ်းဆီးခံရပြီး အကျဉ်းထောင်အသီးသီးမှာ သေဒဏ်ချခံရသူဟာ ဒီနေ့အချိန်ထိ ၇၂ ဦးထိရှိတယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP) ရဲ့ စာရင်းအရသိရပါတယ်။

စစ်အုပ်စုက သေဒဏ်ကို စတင်အကောင်အထည်ဖော်လာတဲ့အတွက် အဲဒီ ၇၂ ဦးလည်း တရားလက်လွတ်ထပ်မံကွပ်မျက်ခံရမယ့်အလားအလာတွေရှိနေတယ်လို့ AAPP က သတိပေးထားပါတယ်။

၁၉၈၈ ခုနှစ်နောက်ပိုင်း မြန်မာနိုင်ငံမှာ သေဒဏ်စီရင်မှုတွေကိုဆိုင်းငံ့ထားခဲ့ပေမယ့် ပြီးခဲ့တဲ့ရက်ပိုင်းက ကိုဂျင်မီ၊ကိုဇေယျာသော်၊ကိုလှမျိုးအောင် ၊ကိုအောင်သူရဇော်တို့ ၄ ဦးကို သေဒဏ်စီရင်လိုက်ပြီလို့ စစ်ကောင်စီက ထုတ်ပြန်ကြေညာခဲ့ပါတယ်။ ခုအချိန်ထိတော့ သေဒဏ်စီရင်ပြီးဖြစ်တဲ့ တိကျတဲ့အထောက်အထားမှတ်တစ်စုံတစ်ရာထုတ်ပြန်တာမျိုးတော့ မရှိသေးသလို ကာယကံရှင်မိသားစုတွေကို ရုပ်အလောင်းပြန်ပေးဖို့လည်း ငြင်းဆိုထားပါတယ်။

Public Service Announcement

ဒါဟာ ဆယ်စုနှစ် ၃ ခုကျော်ကြာ ပြည်တွင်းမှာ ဆိုင်းငံ့ထားတဲ့ သေဒဏ်စီရင်မှုကို စစ်ကောင်စီကအသက်ပြန်သွင်းလာတာလည်းဖြစ်ပါတယ်။

ဒီမိုကရေစီအရေးတက်ကြွလှုပ်ရှားသူ ၄ ဦးကို တရားလက်လွတ် ဒီလိုစီရင်လိုက်တာဟာ နောက်ထပ်အလားတူ သေဒဏ်ကျခံရသူတွေအတွက်လည်း စိုးရိမ်စရာတွေဖြစ်လာပါတယ်။