ဇူလိုင်-၂၇၊၂၀၂၆။People’s Spring
နိုင်ငံတကာက မြန်မာနဲ့ သံတမန်ရေး ထိတွေ့မှုတွေကို မြှင့်တင်ဖို့ ခြေလှမ်းပြင်လာချိန်မှာပဲ အာဏာသိမ်း စစ်တပ်ကမြန်မာပြည်သူတွေအပေါ် သတ်ဖြတ်မှုတွေလျော့ပါးမသွားတဲ့အပြင်ပိုပြီးတောင်ဆိုးရွားလာနေတယ်လို့ နိုင်ငံတကာ လေ့လာစောင့်ကြည့်မှု အဖွဲ့တစ်ခုက ထောက်ပြခဲ့ပါတယ်။
အထူးသဖြင့်အာဏာသိမ်းစစ်ခေါင်းဆောင် မင်းအောင်လှိုင်ကအတုအယောင်ရွေးကောက်ပွဲ တစ်ခုကို အသုံးပြုပြီး သမ္မတရာထူး ရယူခဲ့တဲ့နောက်ပိုင်းစစ်တပ်ရဲ့သတ်ဖြတ်မှုတွေက ပိုပြီး ဆိုးရွားလာနေတယ်လို့ ပဋိပက္ခ ဒေသတွေက လူ့အခွင့်အရေးချိုးဖောက်မှုတွေကို စောင့်ကြည့်တဲ့ Armed Conflict Location & Event Data Project (ACLED) အဖွဲ့က သတိပေးခဲ့ပါတယ်။
တစ်ဖက်မှာတော့ အရှေ့တောင်အာရှ နိုင်ငံများ အစည်းအရုံး (အာဆီယံ)နဲ့ ဒေသတွင်း အစိုးရတွေက မြန်မာစစ်တပ်အပေါ် သံတမန်ရေးအရ ကြောင်းကျိုးဆီလျော်စွာ ထိတွေ့ဆက်ဆံနိုင်အောင် အားထုတ်မှုတွေ မြင့်တက်လာနေပါတယ်။ဒါပေမဲ့လည်းစစ်တပ်ကတော့ အာဏာသိမ်း စစ်ခေါင်းဆောင် မင်းအောင်လှိုင် နေရာ ဆက်ခံသူ ရဲဝင်းဦး လက်ထက်မှာ ရက်စက်ကြမ်းကြုတ်မှုတွေ၊ လက်မရွံ့ သတ်ဖြတ်မှုတွေ ပိုဆိုးလာနေတယ်လို့ ACLEDက ဆိုပါတယ်။
Public Service Announcement
မတ်လတုန်းကစစ်တပ်ရဲ့အုပ်ချုပ်ရေး အပိုင်းမှာအပြောင်းအလဲဖြစ်ခဲ့တဲ့နောက်ပိုင်း အရပ်သား ပြည်သူတွေအပေါ် ရက်ရက်စက်စက် ဖိနှိပ်မှုတွေ ပိုဆိုးလာသလို လေကြောင်းကနေ ဗုံးကြဲတဲ့ တိုက်ခိုက်မှုတွေလည်းပိုမိုအရှိန်မြင့်လာကြောင်းACLEDကထောက်ပြထားပါတယ်။
သိသိသာသာ ပြောင်းလဲလာတဲ့စစ်ရေး ဗျူဟာတွေထဲမှာတော့ ပစ်မှတ် တစ်ခုတည်းကို လေယာဉ် နှစ်စီးကနေ ငါးစီးထိ စုဖွဲ့ပြီး တိုက်ခိုက်တာမျိုးတွေကို တွေ့လာရတယ်လို့လည်း ACLEDက ဆိုပါတယ်။
အမေရိကန် အခြေစိုက် နိုင်ငံတကာ ပဋိပက္ခတွေ စောင့်ကြည့်ရေး အဖွဲ့အစည်းရဲ့ စွပ်စွဲပြောဆိုချက်နဲ့ ပတ်သက်ပြီး အာဏာသိမ်း စစ်တပ်ဖက်ကတော့ ဘာမှ မတုံ့ပြန်ခဲ့ပါဘူး။ ACLEDဟာမြန်မာ့စစ်ရေးပဋိပက္ခတွေနဲ့ ပတ်သက်လို့ ပြည်တွင်း မီဒီယာတွေ၊ မိတ်ဖက် အဖွဲ့အစည်းတွေ၊ ကုလသမဂ္ဂ အစီရင်ခံတွေ၊ လူသားချင်း စာနာမှု အဖွဲ့အစည်းတွေဆီက သတင်းအချက်အလက်တွေ ရယူပြီး လေ့လာ စောင့်ကြည့်နေတာ ဖြစ်ပါတယ်။
၂၀၂၆ ပထမ နှစ်ဝက်အတွင်း မြန်မာနိုင်ငံမှာ အစုလိုက်သတ်ဖြတ်မှုဖြစ်စဉ်တစ်ဒါဇင်ထက်မနည်း ဖြစ်ပွားခဲ့ပြီးအရပ်သား၄၅၀ ကျော် သေဆုံးခဲ့ကြောင်း၊အဲဒီထဲက ၄၀ ရာခိုင်နှုန်းလောက်ဟာ အညာလို့ခေါ်တဲ့ မြန်မာနိုင်ငံ အလယ်ပိုင်း မိုးနည်းခြောက်သွေ့ ဒေသတွေမှာ ကြုံတွေ့ခဲ့ကြောင်းလည်း ACLEDက ထုတ်ပြန်ခဲ့ပါတယ်။
ထင်ရှားတဲ့ ဖြစ်စဉ် တစ်ခုအနေနဲ့ မြင်းခြံမြို့နယ်ထဲမှာ မေလတုန်းက မြန်မာစစ်တပ်က စစ်ကြောင်းထိုးရင်း လူ ၄၀ လောက်ကို သတ်ဖြတ်ခဲ့တယ်လို့ ACLEDက ဒေသခံ သတင်းရင်းမြစ် သုံးဦးကို ကိုးကားပြီး ဖော်ပြခဲ့ပါတယ်။
စစ်တပ်က ကြမ်းကြုတ်ရက်စက်တဲ့ သတ်ဖြတ်မှုတွေကို အရှိန်မြှင့်နေချိန်မှာ တစ်ဖက်မှာတော့ သမ္မတသစ်အဖြစ် ကိုယ့်ကိုယ်ကိုယ် တင်မြှောက်ထားတဲ့ မင်းအောင်လှိုင်ဟာ တရုတ်နဲ့ အိန္ဒိယတို့လို အိမ်နီးချင်း အင်အားကြီး နိုင်ငံတွေဆီသွားရောက်ရင်းသူဦးဆောင်တဲ့အစိုးရသစ်ကိုတရားဝင်မှုရရှိအောင် ကြိုးစားနေပါတယ်။တစ်ဖက်မှာလည်း အာဆီယံဟာအာဏာသိမ်းမြန်မာစစ်တပ်နဲ့ အဆက်အသွယ် ဖြတ်တောက်ထားရာကနေ အလွတ်သဘော ဆွေးနွေးမှုတွေ ပြန်စပြီး သံတမန်ရေး ထိတွေ့မှုတွေကို ပြန်လည် မြှင့်တင်ဖို့ ခြေလှမ်းပြင်လာခဲ့ပါတယ်။
မင်းအောင်လှိုင်ဟာ ဩဂုတ် ၆ ရက်နဲ့ ၇ ရက်နေ့တွေမှာတော့ ထိုင်းနိုင်ငံကို သွားရောက်ဖို့ စီစဉ်ထားပါတယ်။
ကိုးကား- Reuters
