ယနေ့မှစ၍ ခရီးသွားလာခြင်းလုံး၀ မပြုလုပ်ရန် အရေးပေါ်အသိပေး
ယနေ့မှစ၍ ခရီးသွားလာခြင်းလုံး၀ မပြုလုပ်ရန် အရေးပေါ်အသိပေးချင်းပြည်နယ် ဟားခါး – ထန်တလန်လမ်းပိုင်းကို ယနေ့မှစ၍ ခရီးသွားလာ ခြင်းလုံး၀ မပြုလုပ်ရန် ချင်းဒေသကာကွယ်ရေးတပ်ဖွဲ့များက အရေးပေါ် သတိပေးထုတ်ပြန်လိုက်ကြောင်း ချင်းဒေသခံက ပြောသည်။
လတ်တလောစစ်ရေးအခြေနေများအရ ယခုကဲ့သို့ ထုတ်ပြန်ခဲ့ခြင်းဖြစ်ပြီး အဆိုပါဒေသ၌ အချိန်မရွေး တိုက်ပွဲဖြစ်ပွားနိုင်သည်ဟု ၎င်းက ဆိုသည်။
“အဲဒီမှာ စစ်ကောင်စီတွေက သူတို့ အင်အားဖြည့်နေတာပေါ့။ တံတားကို ပြင်ဖို့လုပ်နေတာပါ။ အခု စစ်ရေးတင်းမာနေပြီးတော့ အဲဒီဘက်ကို ပြည်သူတွေလုံး၀ လုံး၀မသွားဖို့ ထုတ်ပြန် သတိပေးထား တာပေါ့။”ဟု ချင်းဒေသခံက ပြောသည်။
ဟားခါးအခြေစိုက် စစ်ကောင်စီတပ်သည် ဇူလိုင် ၂၇ ရက်မှစ၍ ဟားခါး – ထန်တလန်အကြား သီမြစ်ချောင်းဖက်တွင် တပ်အင်အားဖြည့်တင်းပြီး စစ်ရေးလှုပ်ရှားမှုများ ပြုလုပ်လျှက်ရှိသည်ဟု The Chin Journalက ဖော်ပြထားသည်။
Public Service Announcement
အဆိုပါ သီးမြစ်ချောင်းကူးတံတားကို ချင်းကာကွယ်ရေးတပ်များက ၂၀၂၁ နှစ်ကုန်ပိုင်းကတည်းက စစ်ရေးအရ ဖောက်ခွဲဖျက်ဆီးထားခြင်းဖြစ်သည်။
“အဲဒါ (တံတား)က ဖျက်တောက်ထားတာ။ အဲဒါကို သူတို့က ပြင်ချင်တာ။”ဟု ချင်းဒေသခံက ပြောသည်။
စစ်ကောင်စီတပ်သည် ဇူလိုင်အတွင်းက စစ်ကိုင်းတိုင်း ကလေးမြို့မှ ချင်းပြည် နယ် ဟားခါးသို့ စစ်အင်အားများဖြင့်တင်းထားသည်။ ထိုသို့ အင်အားဖြည့် တင်းလာစဉ်ကလည်း စစ်ကောင်စီတပ်များကို ချင်းကာကွယ်ရေးပူးပေါင်းတပ်များက တိုက်ခိုက်ခဲ့၍ တိုက်ပွဲ ၈ကြိမ်ထက်မနည်းဖြစ်ခဲ့ပြီး စစ်ကောင်စီတပ်က သေဆုံးထိခိုက်မှုများရှိခဲ့သည်။
