ကရင်နီ(ကယား)ပြည်နယ်၊ လွိုင်ကော်မြို့နယ် ဒေါပါပါးကျေးရွာ လူထုကို ပစ်မှတ်ထားပြီး အကြမ်းဖက်စစ်ကောင်စီက လေကြောင်းမှ လက်နက်ကြီးများဖြင့်တိုက်ခိုက်ရာ အရပ်သား ပြည်သူတစ်ဦးသေဆုံးပြီး နှစ်ဦးထိခိုက်ဒဏ်ရာရရှိကြောင်း ဒေသခံသတင်းရင်းမြစ်များက ပြော သည်။
ယနေ့(သြဂုတ် ၉ ရက်) နံနက် ၁၀ နာရီခွဲခန့်က အကြမ်းဖက်စစ်ကောင်စီက ရဟတ်ယာဥ် နှစ်စီး ဖြင့် (၅)ကြိမ်တိုင်တိုင် ဗုံးကြဲတိုက်ခိုက်ခဲ့သည်ဟု ဆိုသည်။
ထို့အပြင် (၁၂၀) မမဖြင့် (၇)လုံးတိတိ ပစ်ခတ်ခဲ့သည်ဟု ဒေသခံများက ပြောသည်။ ထိုသို့ ဗုံးကြဲတိုက်ခိုက် ပစ်ခတ်မှုကြောင့် ဒေသခံ အမျိုးသားတစ်ဦး ဗုံးထိမှန်သေဆုံးပြီး နှစ်ဦး ထိခိုက်ဒဏ်ရာရရှိခဲ့ရကြောင်း ဒေသခံ သတင်းရင်းမြစ်က အသိပေးသည်။
“တိုက်ပွဲ လုံးဝ မဖြစ်ဘဲ နဲ့ကို ဗုံးကြဲခံရတာ။ကလေး တွေ ငိုပြီးထွက်ပြေးခဲ့ရတာ အဲဒီနေရာပဲ”ဟု ၎င်းက People’s Springသို့ ပြောသည်။
Public Service Announcement
ဗုံးကြဲတိုက်ခိုက်ခံရမှုကြောင့် လူထုဆေးပေးခန်းတစ်လုံးနှင့် လူနေအိမ်တစ်လုံး ကြီးကြီးမားမား ပျက်စီးသွားကြောင်းလည်း သိရသည်။
ယနေ့ဖြစ်ရပ်သည် အရပ်ဖက်လူထုပစ်မှတ်အား ရဟတ်ယာဥ်အပြင် လက်နက်ကြီးတို့ဖြင့် တစ်ပြိုင် တည်း ဗုံးကြဲပစ်ခတ်သည့် ပထမဆုံးအကြိမ်ဟု ဆိုသည်။
ကရင်နီပြည်နယ်၌ ရဟတ်ယာဥ်ဖြင့် လူထုကိုပစ်မှတ်ထား၍ ဗုံးကြဲတိုက်ခိုက်သည်မှာ ယခုအကြိမ် အပါအဝင် လေးကြိမ်ဖြစ်ပြီး အရပ်သား လေးဦးသေဆုံးခဲ့သည်။
အာဏာသိမ်းစစ်ကောင်စီသည် ၎င်းအားတော်လှန်လျှက်ရှိသော ဒေသများတွင် စစ်ရာဇဝတ်မှုနှင့် လူသားမျိုးနွယ်စုအပေါ်ကျူးလွန်သည့် ရာဇဝတ်မှုများအား ဆက်လက်ကျူးလွန်လျက်ရှိသည်။
