စစ်ကိုင်းတိုင်း၊ ကန့်ဘလူမြို့နယ် ကာဘိုးစစ်ဆေးရေးဂိတ် ပစ်ခတ်တိုက်ခိုက်ခံရပြီး စစ်ကောင်စီတပ်သားများ ထိခိုက်သေဆုံးမှုရှိကြောင်း ဒေသတွင်း သတင်းရင်းမြစ်များက ပြောသည်။
ယမန်နေ့(စက်တင်ဘာ ၃ရက်)နံနက် ၁၁နာရီခွဲခန့်က စစ်ကောင်စီတပ်နှင့် ပျူစောထီးများ အထိုင်ချထားသော ကာဘိုးစစ်ဆေးရေးဂိတ်ရှိ စစ်အုပ်စုနှင့်ပျူ ၁၅ဦးကို ဝင်ရောက်ပစ်ခတ်ခဲ့ရာ စစ်ကောင်စီတပ်ဖွဲ့ဝင် လေးဦးသေဆုံးပြီး ခြောက်ဦး ထိခိုက်ဒဏ်ရာရရှိသွားကြောင်း ဒေသတွင်းအဖွဲ့များက Voice Of Taze သို့ သတင်းပေးထားသည်။
အဆိုပါဖြစ်စဥ်တွင် ရွှေဘိုခရိုင်တပ်ရင်း(၇)၊ တန့်ဆည် နယ်ပြည်သူလုံခြုံရေးတပ်ဖွဲ.(ပ.လ.ဖ)၊ မြောက်ပိုင်းမဟာမိတ်ဖွဲ့(ဓူဝံ)တို့က ပူးပေါင်းတိုက်ခိုက်ခဲ့ခြင်းဖြစ်ပြီး ပြည်သူရဲဘော်တစ်ဦး ဒဏ်ရာအနည်းငယ်ရရှိကာ မစိုးရိမ်ရကြောင်း ဒေသတွင်းအဖွဲ့များက ပြောသည်။
သြဂုတ်အတွင်းက စစ်ကောင်စီတပ်များသည် ကန့်ဘလူ၊ ကျွန်းလှနှင့် ကောလင်းမြို့နယ်စပ်ကျေးရွာများကို မီးရှို့ဖျက်ဆီးခြင်းများပြုလုပ်ခဲ့ပြီး ဒေသခံပြည်သူ ၄၀ထက်မနည်း ဖမ်းဆီးသတ်ဖြတ်ခံခဲ့ရသည်။