'/%3E%3C/svg%3E){kind=small}
တနင်္သာရီတိုင်း ထားဝယ်မြို့နယ်တွင် စစ်ကောင်စီတပ်နှင့် ဒေသကာကွယ်ရေးတပ်များနှစ်ရက်ဆက်တိုက်ပွဲဖြစ်ပြီး စစ်ကောင်စီတပ်မှ ၂၃ဦးခန့်သေဆုံးကာ PDF ရဲဘော်နှစ်ဦး မစိုးရိမ်ရဒဏ်ရာရခဲ့ကြောင်း ထားဝယ်ပြောက်ကျားတော်လှန်ရေးတပ်ဖွဲ့(DGRF)က ယနေ့ (စက်တင်ဘာ ၄)တွင် ထုတ်ပြန်သည်။
တိုက်ခိုက်မှုဖြစ်စဥ်များအနက် စက်တင်ဘာ ၁ ရက် နံနက် ၁၀ နာရီ ၄၀မိနစ်ခန့်က ထားဝယ် အရှေ့တောဒေသ ထားဝယ်-ထီးခီးလမ်းမကြီးအတိုင်း ထားဝယ်မြို့ဖက်မှလာသော စစ်ကောင်စီယာဉ်တန်းအား DGRF (ထား ဝယ်-ပကဖ)နှင့် မဟာမိတ်အဖွဲ့တို့ ပူးပေါင်းပြီး ယာဉ်တန်း၏ ရှေ့ပြေးအဖွဲ့အား သရက်ငုတ်ကျေးရွာအနီး ကြားဖြတ်တိုက်ခိုက်ခဲ့သည်ဟု ဆိုသည်။
အဆိုပါပစ်ခတ်မှုတွင် ၁၅ မိနစ်ခန့်ကြာမြင့်ခဲ့ပြီး စစ်ကောင်စီဘက်မှ ဗိုလ်ကြီးတစ်ဦးအပါအဝင် ရှစ်ဦးသေဆုံးပြီး ငါးဦးထက်မနည်း ထိခိုက်ဒဏ်ရာရရှိခဲ့သွားကြောင်း ဖော်ပြသည်။
ယင်းကြားဖြတ်တိုက်ခိုက်မှုဖြစ်စဥ်တွင် ပြည်သူ့ဘက်တော်သား မဟာမိတ်တပ်များအနေဖြင့် အထိအခိုက်ကျဆုံး တစ်စုံတစ်ရာမရှိဘဲ အောင်မြင်စွာပြန်လည်ဆုတ်ခွာနိုင်ခဲ့သည်ဟု ထုတ်ပြန်သည်။
Public Service Announcement
အလားတူ စက်တင်ဘာ ၂ ရက် နံနက် ၈ နာရီခန့်ကလည်း ထားဝယ်မြို့နယ် (၂၃)မိုင်တွင် မေတ္တာမှဆင်းလာသည့် စစ်ကောင်စီတပ်နှင့် DGRF (ထားဝယ်-ပကဖ) ၊ T-1 မြင်းမတ်တပ်တပ်ခွဲနှင့် ပြည်သူ့ကာကွယ်ရေးအဖွဲ့(ထား ဝယ်) ပူးပေါင်းအဖွဲ့တို့ ထိတွေ့ရင်ဆိုင်တိုက်ပွဲဖြစ်ပွားခဲ့ရာ တိုက်ပွဲချိန် ၃နာရီခန့် ကြာမြင့်ခဲ့သည်ဟု ဆိုသည်။
ယင်းတိုက်ပွဲတွင် စစ်ကောင်စီတပ်သား ၁၅ဦးခန့်သေဆုံးကာ ပြည်သူ့ကာကွယ်ရေးအဖွဲ့ဝင်နှစ်ဦး ထိခိုက်ဒဏ်ရာ(မစိုးရိမ်ရ)ရခဲ့သည်ဟု ဖော်ပြသည်။
ပြည်သူ့ကာကွယ်ရေးတပ်များနှင့် စစ်ကောင်စီတပ်တို့ကြား အချိန်အခါနေရာမရွေး တိုက်ပွဲများဖြစ်ပွားနိုင်သောကြောင့် မိဘပြည်သူများအနေဖြင့် စစ်ဘက်ဆိုင်ရာအဆောက်အအုံ၊ တပ်စခန်း ၊ ရဲကင်း ၊ စစ်ကား ၊ ရဲကား ယာဉ်တန်းများနှင့် ခပ်ဝေးဝေးမှ ရှောင်ရှားသွားလာကြရန် အထူးထပ်မံ သတိပေးပန်ကြားအပ်ပါသည်ဟု ထုတ်ပြန်ထားသည်။
