ဝက်လက်မြို့နယ်အတွင်းရှိ ရွှေပန်းကုန်းကျေးရွာတွင်တည်ရှိသော စစ်ကောင်စီရဲစခန်းကို စခန်းသိမ်းတိုက်ပွဲဆင်နွဲခဲ့ပြီး နှစ်ဖက်ထိခိုက်သေဆုံးမှုများရှိခဲ့သည်ဟု 96 Soldiers-PDF အညာဒေသတပ်ခွဲမှ သတင်းထုတ်ပြန်သည်။
ယနေ့ အောက်တိုဘာလ(၁၇)ရက် မနက်အစောပိုင်းက ဝက်လက်မြို့နယ်ရှိ ရွှေပန်းကုန်းကျေးရွာတွင်ရှိသည့် စစ်ကောင်စီရဲစခန်းကို 96 Soldier-PDFတပ်ဖွဲ့၊ ဒေါင်းနီအဖွဲ့၊ မြင်းဖြူရှင်အဖွဲ့ တောသားကြီးအဖွဲ့တို့မှ ပူးပေါင်း၍ စခန်းသိမ်းတိုက်ပွဲဆင်နွဲခဲ့ခြင်းဖြစ်သည်။
တိုက်ပွဲတစ်နာရီခန့်အကြာတွင် စစ်ကောင်စီဘက်မှ လေကြောင်းပစ်ကူများပေးခဲ့သည်ဟု ထုတ်ပြန်ချက်တွင်ဖော်ပြထားသည်။
“လေယာဉ်ပစ်ကူများ ရွှေပန်းကုန်းကျေးရွာ ကောင်းကင်ယံထက်တွင်ပျံသန်း၍ မြေပြင်ကိုတရစပ် ပစ်ခတ်သောကြောင့် ကျွန်တော်တို့တပ်ဖွဲ့ဝင်များ ဆုတ်ခွာခဲ့ရပါသည်” ဟု ထုတ်ပြန်ချက်တွင်ဖော်ပြထားသည်။
Public Service Announcement
96 Soldiers-PDF အဖွဲ့မှ ကိုဇေယျာလွင်က “ဒီနေ့ တိုက်ပွဲသတင်းထုတ်ပြန်ချက်ပါ။ တစ်ဦးဒဏ်ရာရပါတယ်(မပြင်းထန်ပါဘူး)၊ တစ်ဦးက ကျဆုံးခဲ့ပါတယ်” ဟု သူ၏ လူမှုကွန်ယက်စာမျက်နှာတွင် ရေးသားမျှဝေထားသည်။
ထိုတိုက်ပွဲတွင်တော့ 96 Soldiers-PDF အဖွဲ့မှ ရဲဘော်တစ်ယောက် ထိခိုက်ဒဏ်ရာရရှိပြီး တစ်ဦးကျဆုံးသွားခဲ့စည်။ စစ်ကောင်စီဘက်ကလည်း နှစ်ဦးသေဆုံးပြီး ခြောက်ဦးအပြင်းအထန်ဒဏ်ရာရရှိခဲ့သည်ဟု ဆိုသည်။
